काठमाडौं (हाम्रो खेलकुद) – बालबालिकामाथि हुने गरेको दुर्व्यवहार अन्त्यका लागि सांकेतिक आव्हान स्वरुप मैत्रीपूर्ण फुटसल प्रतियोगिता आयोजना भएको छ ।

बालअधिकार अभियान नेपाल, बालअधिकारका लागि राष्ट्रिय अभियान नेपाल र जिल्ला बालक्लब सञ्जाल काठमाडौंको संयुक्त आयोजनामा शुक्रबार मैत्रीपूर्ण फूटसल आयोजना भएको हो । काठमाडौं सिनामंगलस्थित फाइभ फाइभ फूटसलमा भएको मैत्रीपूर्ण फुटसलमा ललित बहादुर शाहीको नेतृत्वको नीलो समूहले रमेश खतिवडाको नेतृत्वको रातो समूहलाई ६–४ को गोलअन्तरले पराजित गर्‍यो । फुटसलमा सहभागी अभियन्ता खेलाडीहरुलाई प्रमाणपत्र प्रदान गरिएको थियो ।

बालबालिकामाथि हुने गरेका दुर्व्यवहारको अन्त्यका लागि सांकेतिक आव्हान स्वरुप यस कार्यक्रमको आयोजना गरिएको बालअधिकारका लागि राष्ट्रिय अभियान नेपालका संयोजक प्रविण सिलवालले बताए । साथै पीडामा परेका बालबालिकाको संरक्षणका लागि वयस्क अभियन्ताहरुको पनि एकबद्धता होस् भन्ने उद्देश्यका साथ कार्यक्रमको आयोजना गरिएको जिल्ला बालक्लब सञ्जालका अध्यक्ष राजाराम बस्नेतले बताए ।

बालक्लबका पदाधिकारी, बालक्लबका पूर्व पदाधिकारी तथा बालअधिकारको क्षेत्रमा क्रियाशील नागरिकहरुको संयुक्त पहलमा “बालबालिकाको भविष्य सुरक्षित, संरक्षित र बालअनुकूल पार्न वर्तमानमा क्रियाशील बनौं“ भन्ने नाराका साथ यस अभियान सुरू गरिएको बालअधिकार अभियान नेपालका संयोजक नवीनचन्द्र घिमिरेले बताए ।

मैत्रीपूर्ण फूटसल कार्यक्रममा बालअधिकारको क्षेत्रमा क्रियाशील ४० जना बालबालिकादेखि अग्रज अभियन्ताहरुको सहभागिता रहेको थियो ।