काठमाडौं

रेडबुल फुटसल लिग अन्तर्गत शुक्रबार भएका खेलमा ताहाचल फुटसल र ह्वाइट हर्स फुटसलले जित हासिल गरेका छन् ।

ताहाचल फुटसले हाइवे फुटसललाई ९–२ को फराकिलो गोल अन्तरले पराजित गरेको छ । समूह बीको शीर्ष स्थानमा उक्लिएको ताहाचललाई जिताउन म्यान अफ द म्याच रामकुमार कुमालले ५ गोल गरे भने राज शाहीले २, अनिल तामाङ र सुजित बुढाथोकीले १-१ गोल गरे । पराजित हाइवेका लागि रमेश तामाङ र जंबु शेर्पाले १-१ गोल गरे ।

त्यसैगरी शुक्रबार नै भएको अर्को खेलमा ह्वाइट हर्स फुटसलले आदर्श फुटसललाई ३–२ गोल अन्तरले पराजित ग¥यो । ह्वाइट हर्सको जितमा प्रनेश गोर्खाली र मञ्जिल महर्जनले १-१ गोल गरे भने अर्को एक गोल आदर्शका डेनियल श्रेष्ठबाट आत्मघाती रुपमा उपहार पायो ।

समूह बीको पुछारमा रहेको आदर्शका लागि राजु बुढाथोकी र दिलिप तामाङले १-१ गोल गरे पनि आफ्नो टोलीलाई विजयी बनाउन सकेनन् ।
समूह एमा ५ खेलेको किकअफ फुटसलले लिगमा अपराजित हुँदै १५ अंक जोडेर शीर्ष स्थान कब्जा गरेको छ भने बानेश्वर फुटसल रिक्रियसन सेन्टरले ६ खेलबाट १० अंक जोडेर दोस्रो स्थानमा छ भने ह्वाइट हर्स पनि १० अंक जोड्दै तेस्रो स्थानमा उक्लिएको छ । त्यसैगरी समूह बीमा ६ खेलबाट १३ अंक जोडेको ताहाचल शीर्ष स्थानमा रहँदा समान ११ अंक जोडेको कुमारी र हरिसिद्धि फुटसल दोस्रो र तेस्रो स्थानमा छन् ।

एएमए इभेन्टको आयोजनामा होम एन्ड अवेको आधारमा २८ मंसिरसम्म सञ्चालन भइरहेको लिगमा काठमाडौं, ललितपुर र भक्तपुरका विभिन्न १६ फुटसल टिमको सहभागिता रहेको छ ।