काठमाडौं (हाम्रो खेलकुद) – नेपाली सेनाको आयोजना तथा नेपाल टेनिस संघको प्राविधिक सहयोगमा प्रथम प्रधान सेनापति राष्ट्रिय लन टेनिस प्रतियोगिता यसै महिना आयोजना हुने भएको छ ।

नेपाली सैनिक शारीरिक तालिम तथा खेलकुद केन्द्रले सोमबार राजधानीमा पत्रकार सम्मेलनमार्फत प्रतियोगिता २७ मंसिरदेखि ५ पुससम्म हुने जानकारी गराएको हो । प्रतियोगितामा खुल्लातर्फ चार, भेट्रान्सतर्फ ७ र सरकारी निकायबीचको एक गरी १२ विधा समावेश गरिएको नेपाली सैनिक शारीरिक तालिम तथा खेलकुद केन्द्रका केन्द्रपति मुनाल बस्नेतले जानकारी गराए ।

प्रतियोगितामा सहभागी हुनको लागि खेलाडीले कुनै न कुनै क्लबको प्रतिनिधित्व गर्नुपर्ने र एक खेलाडीले बढीमा दुई इभेन्ट्समा सहभागिता जनाउन पाउनेछ । कुनै पनि इभेन्ट्समा कम्तीमा आठ टिम सहभागी हुनुपर्ने र सो भन्दा कम भएमा पुरस्कार राशि घटाई वा खेल नै स्थगित गर्ने सेनाले जनाएको छ ।

प्रतियोगितामा विजयी हुने टिमलाई रनिङ ट्रफी प्रदान गरिनेछ । एकै क्लब तीन पटक विजयी भएमा रनिङ ट्रफीको रिप्लिका क्लबलाई प्रदान गरिनेछ । खेलाडी, प्रशिक्षक र अफिसियलले कोभिन –१९ को प्रोटोकल पुरा गर्नुपर्नेछ । टिम दर्ताको लागि ७ देखि २२ मंसिरसम्म समय तोकिएको छ । खेलहरु आर्मी अफिसर्स क्लबको कोर्ट र त्रिपुरेश्वरस्थित दशरथ रंगशालाको कोर्टमा हुनेछ ।

खुल्ला पुरुष एकल, महिला एकल, पुरुष डबल्स, महिला डबल्स विधा समावेश गरिएको छ । भेट्रान्सतर्फ ३५ वर्षमाथि एकल, ३५ वर्षमाथि डबल्स, ४५ वर्षमाथि एकल, ४५ वर्षमाथि डबल्स, ५५ वर्षमाथि एकल, ५५ वर्षमागि डबल्स र ६५ वर्षमाथि एकलमा प्रतिस्पर्धा हुनेछ । सरकारी कर्मचारीबीच पुरुष डबल्समा प्रतिस्पर्धा हुनेछ ।

पुरुष एकल र महिला एकलको विजेताले समान ५० हजार रुपैयाँ हात पार्नेछ । दोस्रो हुनेले समान २५ हजार तथा सेमिफाइनलमा पराजित हुनेले समान १५–१५ हजार रुपैयाँ हात पार्नेछ । पुरुष डबल्स, महिला डबल्सको विजेताले समान ४० हजार रुपैयाँ हात पार्नेछ । दोस्रो हुने जोडीले समान २० हजार तथा सेमिफाइनलमा पराजित हुने जोडीले समान १०–१० हजार रुपैया हात पार्नेछ ।

३५ वर्षमाथि एकलको विजेताले ३० हजार, दोस्रो हुनेले १५ हजार र सेमिफाइनलमा पराजित हुने टोलीले समान ८–८ हजार प्राप्त गर्नेछ । ३५ वर्षमाथि डबल्स र ४५ वर्षमाथि एकलको विजेताले समान २५ हजार, दोस्रो हुनेले १३ हजार र सेमिफाइनलमा पराजित हुनेले समान ७–७ हजार प्राप्त गर्नेछ ।

४५ वर्षमाथि डबल्स र ५५ वर्षमाथि एकलको विजेताले समान २० हजार, दोस्रोले १० हजार र तेस्रो हुनेले समान ५–५ हजार रुपैयाँ हात पार्नेछन् । ५५ वर्षमागि डबल्स र ६५ वर्षमाथि एकलको विजेताले समान १५ हजार, दोस्रोले ८ हजार र तेस्रो हुनेले समान ४–४ हजार रुपैयाँ प्राप्त गर्नेछन् ।

सरकारी कर्मचारीबीच पुरुष डबल्सको विजेताले २५ हजार, दोस्रो हुने जोडीले ८ हजार र तेस्रो हुने दुई जोडीले समान ४–४ हजार प्राप्त गर्ने आयोजक सेनाले जनाएको छ ।