काठमाडौं (हाम्रो खेलकुद) – कीर्तिमानी अल्ट्रा म्याराथन धाविका मीरा राई आगामी रारा म्याराथनको सद्भावना दुत (गुडवील एम्वासडर) चयन भएकी छिन् ।

अन्तरालको आयोजना र व्यवस्थापनमा वैशाख ११ गते आयोजना हुने पुरुष तथा महिला फुल म्याराथनमा मीरालाई सद्भावना दुतका रुपमा सहभागिता हुने बताइएको छ । मुगुको प्रसिद्ध मनमोहक रारा तालबाट सुरु भई चुचेमारा हिमाल, डाँफे लेक, हुँदै जुम्ला बजार पुगेर समापन हुने बताइएको छ ।

रारा म्याराथनका अध्यक्ष जयनारायण शाहले मीरा राई जस्तो कीर्तिमानी धाविकालाई सद्भावना दुतको रुपमा पाउँदा रारा म्याराथनको उचाई बढेको बताए । ‘मीरा राई जस्तो व्यक्तित्व, जसको जीवनयात्रा सुन्दा दन्त्यकथा जस्तो लाग्छ । उहाँको अनुभव, साहस र अन्तराष्ट्रिय अनुभवबाट नयाँ खेलाडीले धेरै कुरा सिक्नेछन ’ अध्यक्ष शाहले भने, ‘जुम्ला विश्व किर्तिमानी धावक हरिबहादुर रोकाया दाईको ठाँउ हो, उहाँको मार्ग निर्देशनमा हामी अघि बढिरहेका छौं । जुम्लामा हरीदाईको अनुभव लगाव, मिहिनेतले हुर्किएका नयाँ खेलाडीको लागि रारा म्याराथन घरमै ठूलो अवसर हुनेछ, सबै खेलाडीको लागि त छदैछ ।’

रारा म्याराथनको सद्भावना दुत भएसँगै मीराले नयाँ खेलाडीलाई प्रोत्साहन गर्न उनीहरुसँगैं दौडिने बताइन् । मीरा राई विश्व एथलेटिक्स जगतमा साहसिक नेपाली ट्रेल तथा स्काई रनरका रुपमा परिचित एथलेट हुन । दर्जनौं अन्तराष्ट्रिय प्रतियोगितामा सहभागि भएर पदक जित्न सफल मीरा सन् २०१७ को ‘नेसनल जोग्राफी एडभेन्चरर अफ द एयर’ विजेता हुन ।

अन्तराल विगत १५ वर्षदेखि खेलकुद, इभेन्ट म्यानेजमेन्ट, गीत संगीत, फोटोग्राफी, डकुमेन्ट्री निर्माण, पुस्तक प्रकाशनका काम गरिरहेको संस्था हो । विश्व किर्तिमानी धावक हरिबहादुर रोकायको जीवनीमा आधारित डकुमेन्ट्री ‘हरिबहादुर ‘ए हिडेन गिनिज वल्ड रेकर्ड होल्डर’ अन्तरालले निर्माण गरेको हो ।