दमक (हाम्रो खेलकुद) – विभागीय टोली त्रिभुवन आर्मी क्लब र नेपाल एपिएफ क्लब प्रथम दमक कप राष्ट्रिय महिला भलिबल प्रतियोगिताको सेमिफाइनलमा प्रवेश गरेका छन् ।

झापा दमकको पसुहाटमा आइतबार भएको खेलमा सफलता हात पार्दै आर्मी र एपिएफले अन्तिम चारमा स्थान पक्का गरेका हुन् । आर्मीले आफ्नो समूह चरणको अन्तिम खेलमा आयोजक दमक भलिबल क्लबलाई ३–० को सोझो सेटमा पराजित गर्दै समूह ‘बी’ बाट सेमिफाइनलमा प्रवेश गरेको हो ।

एकपक्षीय खेलमा आर्मीले दमकमाथि २५–९, २५–१५ र २५–९ को सोझो सेटमा जित निकाल्न सफल भयो । आर्मीले दुई खेलबाट ४ अंक जोड्यो । एक खेल कम खेलेको डायमन्डको २ अंक छ । डायमन्डले दमकलाई हराउन सके समूह विजेता बन्नेछ ।

दमक अंकविहीन हुँदै पुछारमा छ । शनिबार होङ्गान्जी न्यु डायमन्ड स्पोर्ट्स क्लबले आर्मीमाथि ३–२ को रोमाञ्चक र प्रतिस्पर्धात्मक जित निकाल्न सफल भएको थियो ।

अर्काे खेलमा एपिएफले प्रदेश १ माथि ३–० को सोझो सेटमा जित निकाल्दै समूह उपविजेताको रुपमा सेमिफाइनलमा पुग्न सफल भएको छ । आइतबार एपिएफले प्रदेश १ माथि २५–११, २५–१० र २५–१२ को सोझो सेटमा जित निकाल्न सफल भयो । एपिएफ पहिलो खेलमा पुलिससँग ३–० को सोझो सेटमा पराजित भएको थियो ।

दमक भलिबल संघले ११२औं अन्तर्राष्ट्रिय महिला दिवसको अवसरमा आयोजना महिला राष्ट्रिय भलिबल प्रतियोगितामा ६ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ ।

समूह ‘ए’ मा एपिएफसँगै पुलिस र प्रदेश १ तथा समूह ‘बी’ मा आर्मी, अमक भलिबल क्लब र न्यू डायमन्ड स्पोर्ट्स क्लब रहेका छन् । हरेक समूहका शीर्ष दुई टोली सेमिफाइनलमा प्रवेश गर्नेछन् । फाइनल २४ फागुनमा हुनेछ ।

प्रतियोगिताको विजेता २ लाख रुपैयाँसँग ट्रफी हात पार्नेछ । दोस्रो हुने टोलीले १ लाख प्राप्त गर्नेछ । सात्वना टोलीलाई समान १५ हजार रुपैया प्रदान गरिनेछ । विधागततर्र्फ सर्वाेत्कृष्ट खेलाडीले १० हजार रुपैया प्रदान गरिने आयोजकले जनाएको छ ।

यस्तै व्यक्तिगतविधातर्फ स्पाइकर, ब्लकर, सेटर, सर्भर, डिफेन्डरले समान ५ हजार प्राप्त गर्नेछन् ।