काठमाडौं (हाम्रो खेलकुद) – नेपाल खेलकुद पत्रकार मञ्च (एनएसजेएफ) को अध्यक्षमा दुर्गानाथ सुवेदी (देवेन्द्र) दोस्रो कार्यकालका लागि निर्वाचित भएका छन् ।

एनएसजेएफको बुधबार भएको १७औं वार्षिकबाट सुवेदी आगामी तीन वर्षका लागि अध्यक्षमा पुनः निर्वाचित भएका हुन् । निर्वाचनमा सुवेदीले ५९ मत प्राप्त गरे । अध्यक्षका अर्का प्रत्यासी प्रकाश तिमल्सिनाले ३३ मत प्राप्त गरे ।

यस्तै प्रथम उपाध्यक्षमा निरन्जन अधिकारी, उपाध्यक्षमा सन्जिव शिल्पकार र गोविन्द रेग्मी, महासचिवमा प्रज्वल ओली, सचिवमा अन्जन खड्का र कोषाध्यक्षमा सुजन श्रेष्ठ निर्विरोध निर्वाचित भए ।

खुला सदस्यमा अनिल मल्ल ठकुरी, निशान राई र कुशल तिमल्सिना निर्वाचित भए । अनिलले ६८, निशानले ६५ र कुशलले ५३ मत प्राप्त गरे । सदस्यका अर्का प्रत्यासी सन्जिव शाहले २८ मत पाए । महिला सदस्यमा मुना कार्की निर्वाचित भईन । महिला सदस्यमा विजयी मुनाले ६२ मत प्राप्त गरिन् । अर्का प्रत्यासित लक्ष्मी जिसीले ३१ मत प्राप्त गरिन् ।

मञ्चका कुल सदस्य १०० जना रहेकामा नेपालमा उपलब्ध भएका ९८ सदस्य मध्येबाट ९४ मत खसेको थियो । निर्वाचित पदाधिकारीलाई नेपाल पत्रकार महासंघका केन्द्रिय सदस्य विकास कार्कीले प्रमाणपत्र प्रदान गरे । अध्यक्षमा निर्वाचित सुवेदीले अघिल्लो कार्यकालमा पूरा गर्न नसकेका काम अबको कार्यकालमा पूरा गर्ने प्रतिबद्धता व्यक्त गरे ।