काठमाडौं (हाम्रो खेलकुद) – अजर केशर सिंह र रिद्धि शाक्यसँगै गोपाल थापा, विनायक श्रेष्ठ र राज श्रेष्ठले चौथो संस्करणको धनलक्ष्मी स्मृति राष्ट्रिय राष्ट्रिय स्क्वास प्रतियोगिता अन्तरगत पुरुष खुल्लातर्फ विजयी सुरुवात गरेका छन् ।

सातदोबाटोस्थित स्क्वास कोर्टमा भएको पहिलो दिनको प्रतिस्पर्धामा अजरले दिव्य बज्राचार्यलाई तथा रिद्धिले सद्या प्रधानंगलाई ३–० को सोझो सेटमा पराजि तगर्दै विजयी सुरुवात गर्न सफल भएको हो ।

अजरले दिव्यलाई ११–४, ११–२ र ११–३ ले सहजै हरायो । यस्तै रिद्धिले सद्यामाथि १२–१०, ११–५ र ११–७ को सोझो सेटमा पराजित गरेको छ । यस्तै पुरुष खुल्लातर्फ गोपाल थापाले प्रयाग जोशीलाई ५–११, ११–१, ११–४ र ११–७ ले पराजित गरेको छ ।

विनायक श्रेष्ठले शिव कायस्थलाई ११–८, ११–१ र ११–९ ले तथा राज श्रेष्ठले राज महर्जनलाई १४–१६, ११–५, ११–५, ७–११ र ११–४ ले पराजित गर्दै अर्काे चरणमा प्रवेश गर्न सफल भएको छ । मास्टर खुल्ला पुरुष ५० वर्षभन्दा माथि सुरेश शाक्यले रत्न महर्जनलाई १२–१०, ११–७ र ११–९ ले तथा अनिल बज्राचार्यले जुनिल शाक्यलाई ११–५, ११–७ र ११–३ ले पराजित गर्दै विजयी सुरुवात गरेका छन् ।

नेपाल स्क्वास ¥याकेट्स संघको आयोजनामा सोमबारदेखि शुरु भएको प्रतियोगिता २१ साउनसम्म चल्नेछ । संघका अध्यक्ष किशोर महर्जनकी आमा स्वर्गीय धनलक्ष्मी महर्जनको सम्झनामा भएको प्रतियोगितामा पुरुष खुल्ला, महिला खुल्ला, मास्टर खुल्ला पुरुष ५० वर्षभन्दा माथि, जुनियर ब्वाइज ओपन र प्लेट गरी ५ विधा समावेश गरिएको छ ।

पुरुष एकलको विजेताले शिल्डसँगै २५ हजार, दोस्रो हुनेले १५ हजार र तेस्रो हुने दुई जनाले समान १० हजार रुपैयाँ हात पार्नेछन् । महिला एकलको विजेताले शिल्डसँगै २० हजार, दोस्रोले १० हजार र तेस्रो हुने दुई जनाले समान ५ हजार हात पार्नेछन् ।

ब्वाइजको विजेताले १० हजार प्राप्त गर्नेछन् । जुनियरलाई प्रोत्साहनको लागि हरेक खेल जितेबापत् थप ५ सय थपिने संघका अध्यक्ष महर्जनले जानकारी गराए । यस्तै जुनियरतर्फका उत्कृष्ट खेलाडीहरुलाई संघबाट विशेष तालिम प्रदान गरिनेछ । मास्टर खुल्ला पुरुष ५० वर्षभन्दा माथि र प्लेट च्याम्पियनसिपको विजेताले ट्रफी पाउनेछन् ।

संघका अध्यक्ष किशोर महर्जनकी आमा स्वर्गीय धनलक्ष्मी महर्जनको सम्झनामा यो प्रतियोगिताको नामाकरण गरिएको हो । संघका अध्यक्ष महर्जनले आमा धनलक्ष्मीको सम्झनामा गैर नाफामुलक धनलक्ष्मी महर्जन फाउन्डेसन स्थापना गरेको छ ।