काठमाडौं (हाम्रो खेलकुद) – गुरुङ मगर (जिएम समाज) नवलपुरले स्व. बिनय पन्त स्मृति कप पार्क पुरुष भलिबल प्रतियोगिताको उपाधि जितेको छ ।

नयाँ बसपार्कस्थित ढोरपाटन स्पोर्ट्स क्लबको प्रशिक्षण केन्द्रमा शनिबार भएको फाइननलमा जिएम समाजले जेनेक्स भलिबल टिमलाई २–० को सोझो सेटमा पराजित गर्दै उपाधि जित्न सफल भएको हो ।

घनश्याम चौधरी र हिमाल सुनारी रहेको टोली जिएमविरुद्ध जेनेक्सले पहिलो सेटमा कडा चुनौती पेश गरेपनि जिएम २५–२३ ले विजयी हुन सफल भयो । दोस्रो सेटमा जिएमले एकपक्षीय प्रदर्शन गर्दै २५–१२ को सोझो सेटमा जित निकाल्न सफल भयो ।

उपाधिको दावेदार टोलीमा रुपमा रहेको गल्कोट भलिबल संघलाई २–१ को सेटमा स्तब्ध पार्दै बुढानिलकण्ठ भलिबल क्लब कपनले तेस्रो स्थान हासिल गरेको छ ।

पहिलो सेट २३–२५ ले गुमाएको बुढानिलकण्ठले त्यसपछिको दुवै सेट २५–२३ र १५–११ ले आफ्नो पक्षमा पार्न सफल भयो । त्यसअघि शनिबारै भएको सेमिफाइनलमा जेनेक्सले गल्कोटलाई तथा जिएम समाजले बुढानिलकण्ठलाई पराजित गर्दै फाइनलमा स्थान बनाएका थिए ।

उपाधिसँगै जिएम समाजले ५० हजार रुपैयाँ, कप मेडल र प्रमाणपत्र प्राप्त गरेको छ । दोस्रो भएको जेनेक्सले ३० हजार, तेस्रो भएको बुढानिलकण्ठले २० हजार र चौथो भएको गल्कोटले १० हजार रुपैयाँ, कप मेडल र प्रमाणपत्र हात पारेको छ । जिएम समाजका घनश्याम चौधरी प्रतियोगिताको सर्वाेत्कृष्ट खेलाडी घोषित भए । उनले दुई हजार रुपैयाँसँगै आकर्षक गिफ्ट ह्याम्पर प्राप्त गरे ।

जिएम समाजकै विवश आले उत्कृष्ट सेटर, जिएमकै अशोक श्रेष्ठ सर्भर, जेनेक्सका विष्णु बस्नेत स्पाइकर, जिएमका हिमाल सुनारी ब्लकर, बुढानिलकण्ठका सन्जिव गुरुङ उत्कृष्ट डिफेन्डर र जिएमकै धिरज प्रताप गाहा उत्कृष्ट प्रशिक्षक चुनिए ।

बुढानिलकण्ठका सन्जय बस्नेत उदियमान खेलाडी र गल्कोटका दीपक मल्ल ठकुरी अनुशाषित खेलाडी चुनिए । उनीहरुले जनही १ हजार रुपैयाँ र प्रमाणपत्र हात पारे ।

नेपाल भलिबल संघकी उपाध्यक्ष निरोज मास्के, संघका सचिव मनविर छन्त्याल, गण्डकी प्रदेश भलिबल संघका अध्यक्ष नविन कुमार गुरुङ, स्वर्गिय विनय पन्तका दाईहरु सन्तोष पन्त, विजय पन्त र रामचन्द्र पन्त, टिपटप हेल्प नेपाल स्पोर्ट्स क्लबका झम्क श्रेष्ठ, अन्तर्राष्ट्रिय भलिबल रेफ्री बिकास गुरुङ, चिरायु नेशनल हस्पिटल मार्केटिङ प्रमुख किरण फुयाल र आयोजक काठमाडौं किङ्स क्लबका अध्यक्ष अञ्चल शाही लगायतले पुरस्कृत गरे ।

किङ्स क्लब काठमाडौंको आयोजनामा बिहीबारदेखि शुरु हुने प्रतियोगितामा २४ टोलीलाई दुई समूहमा विभाजन गरी नकआउटको आधारमा प्रतिस्पर्धा गराएको थियो ।

गोरखा जिल्ला गोरखा नगरपालिका १२ का स्थायी बासी भलिबल प्रेमी तथा भलिबल खेलाडीलाई अत्यन्तै माया गर्ने विनयको गत वर्षको २६ असोजमा घान्द्रुक घुम्न जाने क्रममा दुर्घटनामा परी निधन भएको थियो ।

उक्त दुर्घटनामा उनीसहित ८ जनाको मृत्यु भएको थियो । उनी सारांगे छहारी भलिबल प्रतियोगिताको सदस्य रहेका थिए ।