काठमाडौं (हाम्रो खेलकुद) – नेपाली ब्याडमिन्टन खेलाडी रत्नजित तामाङले अमेरिकामा भएको सोनिक स्मास ब्याडमिन्टन च्याम्पियनसिप २०२२ मा दोहोरो उपाधि जितेका छन् ।

सिनर्जी ब्याडमिन्टन एकेडेमी फ्रेमन्टमा भएको सोनिक स्मास ब्याडमिन्टन च्याम्पियनसिपमा दोस्रो वरियताका रत्नले पुरुष एकल र मिक्स डबल्समा गरी दोहोरो उपाधि जितेका हुन् ।

रत्नले पुरुष एकलमा जापानी खेलाडी युता किचुकीलाई तथा मिक्स डबल्समा मिया हन्डलेसँग मिलेर युता किचुकी र वेन्लु सिको जोडीलाई हराएर उपाधि जितेका हुन् ।

प्रतिस्पर्धात्मक पहिलो सेट रत्नले २१–१९ ले आफ्नो पक्षमा पारेको थियो । दोस्रो सेट १९–२१ ले गुमाएको रत्नले तेस्रो सेट २१–१९ ले आफ्नो पक्षमा पार्दै च्याम्पियन बन्न सफल भयो । रत्नले च्याम्पियन बन्ने क्रममा सेमिफाइनलमा पनि जापानी लिग खेल्ने राष्ट्रिय खेलाडीको चुनौती पन्छाएको थियो ।

मिक्स डबल्समा रत्न र मियाको जोडीले सुरुवाती सेट १८–२१ ले गुमाएपनि त्यसपछिको दुवै सेट २१–१५ र २२–२० ले आफ्नो पक्षमा पार्दै उपाधि जित्न सफल भयो । उपाधिसँगै पुरुष एकलमा रत्नले ५ सय अमेरिकी डलर र मिक्स डबल्समा १ हजार अमेरिकी डलर प्राप्त गरेको छ ।

१२ देखि १४ अगस्टसम्म भएको प्रतियोगितामा अमेरिकासँगै जापान र क्यानडाका खेलाडीले प्रतिस्पर्धा गरेका थिए । पछिल्लो ८ महिना यता अमेरिकामा रहेका रत्नजित त्यहाँ आफ्नो व्यक्तिगत प्रशिक्षणसँगै प्रशिक्षकको रुपमा पनि व्यस्त छन् । रत्नसँगै नेपालको शीर्ष वरीयताका दिपेश धामी पनि अमेरिकामै रहेका छन् ।