पोखरा (हाम्रो खेलकुद) – गण्डकी प्रदेशका अमृत थापा मगरले नवौं राष्ट्रिय खेलकुद अन्तरगत स्क्वासको पुरुष एकलतर्फ स्वर्ण जितेका छन् ।

पोखरा रंगशालास्थित स्क्वास कोर्टमा अमृतले बागमती प्रदेशका अरहान्त केशर सिंहमाथि ३–२ को रोमाञ्चक र प्रतिस्पर्धात्मक सेटमा जित निकाल्दै राष्ट्रिय खेलकुदमा लगातार तीन संस्करणमा स्वर्ण जित्न सफल भएका हुन् ।

सातौंमा अरहान्तलाई पराजित गरेका अमृतले आठौंमा प्रविन कंसकारलाई हराएर स्वर्ण जित्दा नवौंमा अरहान्तलाई नै हराउन सफल भए । अमृतले सातौपछि अरहान्तलाई हराउन सफल भएको थियो । यसबीचको विभिन्न प्रतियोगितामा अमृतले अरहान्तलाई हराउन सकेको थिएन । तर, नवौंमा अमृतले बाजी मार्न सफल भयो ।

पहिलो सेटमा १२–१० को प्रतिस्पर्धात्मक जित निकालेको अमृतले दोस्रो सेट ८–११ ले गुमाउन पुगेको थियो । तेस्रो सेटमा पनि १२–१० कै जित निकोको अमृतले चौथो सेटमा एक समय ४–१ को अग्रता बनाएपनि त्यसलाई जोगाउन नसक्दा ९–११ ले अरहान्तलाई नतिजा सुम्पन पुग्यो । पाँचै सेटमा भने अमृत ११–८ ले विजयी हुन सफल भयो ।

स्वर्ण जितेपछि अमृतले राष्ट्रिय खेलकुदमा लगातार तीन स्वर्ण जित्न पाउँदा खुशी लागेको बताए । ‘तयारी भनेर गर्न पाएन । सबै कुरा अन्तिम समयमा नै भयो । जे जस्तो भयो राम्रो भयो ।’ स्वर्ण जितेपछि अमृतले भने, ‘स्क्वास डोमिनेट गेम हो । एक जनामाथि जाने बित्तिकै बिट गर्न गाह्रो हुन्छ । स्क्वासमा अरहान्त र अमृत भन्ने छ । तर, अबको एक वर्षका फाइनलमा युवा खेलाडीलाई देख्न सक्नुहुनेछ ।’

यस्तै अमृतले राज्यले खेलकुदलाई धेरै गर्न खोजेपनि पर्याप्त नभएको बताए । ‘राज्यले गर्न खोजेको छ, तर पर्याप्त छैन । अहिलेसम्म खेलाडी आफ्नै खर्चमा खेलिरहेको छ । ठुलो आशा नगरौं सानोतिनो भएपनि गरिदिए राम्रो हुने थियो । प्रतियोगितामा पठाउने, कस्तो सामग्री चाहिन्छ त्यसमा प्रायोजन गरिदियो भने हाम्रो लागि यो नै राम्रो हुनेछ ।

रजतमा सीमित बनेका अरहान्तले यो प्रतियोगितामा अमृत जितको हकदार रहेको बताए । ‘मैले प्रशिक्षणको समय नै पाएन । ५ दिन प्रशिक्षण गरेर खेल्न आएको हुँ । अस्वस्थका कारण खेल्न पनि गाह्रो भइरहेको थियो, अस्वस्थ भएपछि मानसिक रुपमा पनि खेल्न गाह्रो हुन्छ । मलाई त्यही भयो । त्यसैले यसपटक अमृत नै स्वर्णको दावेदार थियो ।’ विभिन्न प्रतियोगिता च्याम्पियन बनेका अरहान्त राष्ट्रियमा भने च्याम्पियन बन्न सकेको छैन ।

यस विधामा बागमतीका अमिर ब्लोन र गण्डकीका दीपक थापाले कास्य जितेका छन् ।