काठमाडौं (हाम्रो खेलकुद) – नेपाल लोकतान्त्रिक खेलकुद संघले नवौं राष्ट्रिय खेलकुदमा पदक प्राप्त गर्न सफल विभिन्न खेलका खेलाडीहरुलाइ सम्मान गरेको छ ।

बुढानिलकण्ठ तथा टोखा नगरापलिका खेलकुद संघको संयुक्त आयोजनामा भएको कार्यक्रममा विभिन्न खेलकुदका ३५ सहित पूर्व खेलाडीहरु तथा पर्वातारोही पत्रकार पूर्णिमा श्रेष्ठलाई समेत सम्मान गरिएको थियो । जसमा पूर्व क्रिकेट खेलाडी पारस खड्का समेत रहेका थिए । तर कार्यक्रममा खड्काको उपस्थिती रहेको थिएन ।

खेलाडीलाई पूर्व कानून, न्याय तथा संसदीय विकास मन्त्री एव नेपाली काँग्रेसका नेता नरहरि आचार्य, काँग्रेसका केन्द्रिय सदस्य प्रदीप पौडेल र संघका केन्द्रिय सचिव मनिष जोशीलगायतले खेलाडीलाई पुरस्कृत गरे ।

आचार्यले खेलाडीहरुले जीवनको उर्जाशिल समय दिएर खेलकुदको लागि जुन मेहनत गरेका छन् त्यसले कालान्तरमा देशकै इज्जत बढाउने बताए । कांग्रेसका केन्द्रीय सदस्य पौडेलले आगामी दिनमा खेलाडीहरुले हाम्रो क्षेत्रबाट निर्वाचित नेतृत्व खेलकुद र विकासका अनुयायी रहेको बताए ।

लोकतान्त्रिक खेलकुद संघका केन्द्रिय सचिव जोशीले आफु नेपाली झण्डालाई अन्तराष्ट्रिय मञ्चमा बोकेर अगाडी बढ्ने पहिलो खेलाडी गजराज जोशीको पुत्र भएको भन्दै खेलाडीले मात्र खेलाडीको भावनालाई बुझ्ने र खेलाडीको हक हितका लागि सदा अग्रस्थानमा रहेर कार्य गर्ने बताए ।

संघका बागमती प्रदेश संयोजक दीपक गुरुले खेल क्षेत्रमा देखिएका विभिन्न बिकृति र विसंगतीका बारेमा प्रकाश पार्दै त्यसलाइ आगामी दिनमा आउने नेतृत्वले समाधान गनुपर्ने औलाए ।

काठमाण्डौ जिल्ला खेलकुद समितिका पूर्व उपाध्यक्ष दामोदर भट्टराई बद्री ले आगामी दिनमा खेलकुद विकास र खेलाडीका हितका लागि नेतृत्वले ध्यान दिनमा आफु बिश्वस्त रहेको बताए ।