काठमाडौं (हाम्रो खेलकुद) – नेपालकी सृजना घिसिङले विश्व पारा तेक्वान्दोको ग्राण्ड प्रिक्स (जी१०) मा ऐतिहासिक स्वर्ण जितेकी छन् । याे नेपाली पारा तेक्वान्दोकाे इतिहासमा ग्राण्ड प्रिक्समा पहिलाे ऐतिहासिक हाे ।
साउदी अरेबियाको रियादमा बिहीबार राति भएको फाइनलमा विश्व वरीयताको शीर्ष स्थानमा रहेकी टर्कीकी क्याभडर मेरयेम बेटुललाई १२–० अंकका आधारमा पराजित गर्दै ऐतिहासिक स्वर्ण जितेकी हुन् । उनले पारा तेक्वान्दो के ४४ विधाअन्तर्गत ५२ केजीमूनिको तौल समूहमा यो उपलब्धि हासिल गरेकी हुन् ।
सृजनाले क्वाटरफाइनलमा विश्व वरीयताको दोस्रो स्थानमा रहेकी मेक्सिकोकी जेसिका क्वीजानोलाई ८–७ अंकका आधारमा तथा सेमिफाइनलमा तेस्रो वरीयताकी ब्राजिली खेलाडी क्रिष्टियन नासिमेन्तोलाई १५–१३ अंकका आधारमा हराएर फाइनलमा पुगेकी थिइन् ।
नेपाली पारा तेक्वान्दोले पहिलोपटक ग्राण्ड प्रिक्समा फाइनल खेलेको हो । नेपालबाट सृजनासँगै ओलम्पियन पलेशा गोवर्द्धनले प्रतिस्पर्धा गरेका थिए । के ४४ कै ५७ केजीमूनि तौल समूहकाे क्वाटरफाइनलमा पलेशा इरानकी इव्राहिमी रोजासँग ८–२ अंकका आधारमा पराजित भइन् ।
यो ऐतिहासिक स्वर्णसँगै सृजना पारा तेक्वान्दोको आफ्नो तौल समूहमा सातौ वरियतामा उक्लनेछिन् । यसअघि उनी १४औं स्थानमा थिइन् । सृजनाले यसअघि एसियन पारा युथ गेम्स र डब्लूटी प्रेसिडेन्ट कपमा रजत जितेकी थिइन् । यस स्वर्ण जितेसँगै सिर्जनाले १ सय अंक बटुलिन् । उनको अब ११२ अंक पुगेको छ ।
पेरिस पारा ओलम्पिक २०२४ का लागि र्याङकिङ प्रतियोगिता समेत भएकाले प्रतियोगिता महत्वपूर्ण थियाे । विश्व वरीयतामा शीर्ष १६ स्थानमा रहने खेलाडीले मात्र यो प्रतियोगितामा सहभागिताको अवसर प्राप्त गर्छन् ।
विश्व वरीयतामा पलेशा १०औं र सिर्जना १४औं स्थानमा छन् । आफ्नो तौल समूहमा शीर्ष ६ स्थानमा रहने खेलाडी पेरिस पारा ओलम्पिकमा सिधै खेल्न पाउने प्रावधान रहेको छ । प्रशिक्षकमा इन्टरनेसनल लेभल– २ पारा तेक्वान्दो प्रशिक्षक कविराज नेगी लामा छन् ।
