काठमाडौैं (हाम्रो खेलकुद) – नेपाली राष्ट्रिय फुटबल टोलीका सदस्य अन्जन विष्ट र भारोत्तोलन खेलाडी कमल बहादुर अधिकारी सम्मानित भएका छन् ।

अन्जनलाई छत्रबहादुर थापा स्मृति ट्रष्ट र कमललाई शिव विष्णु स्मृति ट्रष्टले सम्मानित गरेको हो । सम्मानित दुवैले समान ५० हजार रुपैयाँ र सम्मान पत्रले सम्मानित भए । दुबैलाई नेपाली सेनाका प्रधानसेनापति प्रभुराम शर्माले सम्मानित गरे ।

तत्कालीन शाही नेपाली सेनाका महासेनानी स्व. छत्रबहादुर थापाको स्मृतिमा चौथो पटक सम्मान कार्यक्रम आयोजना भएको हो । यसअघि नेपाली राष्ट्रिय टोलीका सदस्य नवयुग श्रेष्ठ पनि छत्रबहादुर स्मृतिबाट सम्मानित भएका थिए ।

नेपाली राष्ट्रिय टोलीमा नियमित सदस्य अन्जनले हालसम्म ११ गोल गरिसकेका छन् । एन्फा एकेडेमीका अन्जनले बंगलादेशसँग असोजमा भएको मैत्रीपूर्ण खेलमा ह्याट्रिक गरेका थिए । नेपालले १२औं दक्षिण एसियाली खेलकुद (साग), बंगबन्धु गोल्डकप र एएफसी सोलिडारिटी कप जित्दा अन्जन टोलीका मुख्य खेलाडी थिए ।

यसैगरी कमलले सन् २००६ कोलम्बोमा आयोजना भएको १०औं सागमा नेपाललाई स्वर्ण पदक जितेका थिए । त्रिभुवन आर्मी क्लबमा आबद्ध कमलले २०५७ साल यता भारोत्तोलन खेलमा लगातार खेल्दै आइरहेका छन् ।