बिच भलिबल टोलीलाई उपराष्ट्रपति पुनको बधाई

काठमाडौं (हाम्रो खेलकुद) – गत साता सम्पन्न एभीसी एसियन सेन्ट्रल जोन सिनियर पुरुष तथा महिला बिच भलिबल च्याम्पियनसिपमा रजत पदक जित्न सफल खेलाडीसहितको टोलीलाई उपराष्ट्रपति नन्द किशोर पुन ‘पासाङ’ ले बधाई दिएका छन् ।

उपराष्ट्रपति पासाङले बिहीबार आफ्नै कार्यकक्षमा भेट गरी सफलताका लागि बधाई दिएका हुन् । बंगलादेशको कक्स बजारमा गत सम्पन्न च्याम्पियनसिपमा नेपालको पुरुष र महिला दुवै टोलीले रजत पदक जित्न सफल भएका थिए ।

पुरुषमा मानबहादुर श्रेष्ठ र दिल सुनारको जोडी तथा महिलामा कोपिला उप्रेती र कमला पुनको जोडीले ऐतिहासिक रजत पदक जित्न सफल भएका थिए ।

मान र दिलको जोडी फाइनलमा माल्दिभ्सको जोडीसँग तथा कोपिला र कमलाको जोडी श्रीलंकाको जोडीसँग पराजित हुन पुगेको थियो ।