काठमाडौं (हाम्रो खेलकुद) – साविकको विजेता होङ्गान्जी न्यु डायमण्ड युथ स्पोर्ट्स क्लबले काठमाडौंमा जारी सातौं राष्ट्रिय एनभिए क्लब पुरुष तथा महिला भलिबल च्याम्पियनसिपमा महिलातर्फ विजयी सुरुवात गरेका छन् ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा सोमबार भएको समुह चरणको खेलमा डायमन्डले नयाँ बजार सामाजिक युवा क्लबमाथि ३–० को सोझो सेटमा पराजित गरि विजयी सुरुवात गरेको हो ।

पहिलो सेटमा २५–२ को एकपक्षीय जित निकालेको डायमण्डले दोस्रो सेटमा २५–८ को सहज जित निकाल्न सफल भयो । तेस्रो सेटमा पनि डायमण्डले २५–६ को सहज जित निकाल्न सफल भयो । डायमण्डकी सुमित्रा रेग्मी केल्मी केल्मी प्लेयर अफ दि म्याच घोषित भएकी छिन् । उनी आफ्नाे पहिलाे खेलमा नै प्लेयर अफ दि म्याच घोषित भएकी हुन् ।

यस जितसँगै डायमण्डले समूह ‘ए’ मा ३ अंक जोडेको छ । यो समूहमा पुलिसको पनि ३ अंक छ । नयाँ बजार र एभरेष्टले अंक जोड्न सकेको छैन । आज नै एभेरेस्ट भलिबल क्लब र नेपाल पुलिस क्लबबीच प्रतिस्पर्धा हुँदैछ ।

आज नै पुरुषतर्फ ६ खेलमा प्रतिस्पर्धा हुँदैछ । टिप टप हेल्न नेपाल स्पोर्ट्स क्लब र बुढानिलकण्ठ भलिबल क्लब, केशवलाल मेमोरियल भलिबल क्लब र मधेश प्रदेश, आर्मी र मणिमुकुन्द भलिबल क्लब तथा एपिएफ जावलाखेल भलिबल ट्रेनिङ सेन्टरबीच प्रतिस्पर्धा हुँदैछ ।

माघ १ गतेसम्म हुने च्याम्पियनसिपमा पुरुषतर्फ १५ र महिलामा ८ टोलीको सहभागिता रहेको छ । पुरुष र महिला दुवै तर्फको च्याम्पियनले समान ४ लाख रुपैयाँसँगै उपाधि हात पार्नेछन् । दोस्रो हुनेले २ लाख र तेस्रो हुने टोलीले १ लाख रुपैयाँ प्राप्त गर्नेछन् ।

च्याम्पियनसिपको सर्वाेत्कृष्ट खेलाडीले २५ हजार र हरेक विधा (स्पाइकर, सेटर, ब्लकर, सर्भर, डिफेन्स र प्रशिक्षक) ले जनही १० हजार रुपैयाँ प्राप्त गर्नेछन् । त्यस्तै इन्टरनेट सेवा प्रदायक भाएनेटले प्रतियोगिताको विधागत उत्कृष्टलाई ३ महिना र सर्वोत्कृष्ट पुरुष र महिला खेलाडीलाई ६–६ महिनाको इन्टरनेट सेवा प्रदान गर्नेछ ।

यस्तै संघले हाम्रो खेलकुद डटकमसँग १ वर्षको लागि मिडिया राइट्स लिएको जनाएको छ । यससँगै हाम्रो खेलकुद डटकमले संघले १ वर्षभरि गर्ने विभिन्न प्रतियोगिताको प्रत्यक्ष प्रसारण गर्नेछ ।