काठमाडौं (हाम्रो खेलकुद) – विभागीय नेपाल एपिएफ क्लबले सैलुङ बाघढुंगा स्पोर्ट्स क्लबलाई सोझो सेटमा पराजित गर्दै समूह ‘बी’ विजेता बन्दै सातौैं एनभिए महिला तथा पुरुष क्लब भलिबल च्याम्पियनसिपको पुरुषतर्फ क्वाटरफाइनलमा प्रवेश गरेका छन् ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बिहीबार भएको समूह ‘बी’ को अन्तिम खेलमा एपिएफले सैलुङ बाघढुंगामाथि ३–० को सोझो सेटमा जित निकाल्दै समूह विजेता बनेको हो । हारका बावजुत सैलुङ उपविजेता बनेर क्वाटरफाइनलमा पुगेको छ ।

पहिलो र दोस्रो सेटमा क्रमश २५–१३ र २५–१७ को सहज जित हात पारेको एपिएफले तेस्रो सेटमा जित निकाल्न भने निकै संघर्ष गर्नुप¥यो । तेस्रो सेटमा सुरुवातदेखि नै पछि परेको एपिएफले २०–२० को बराबरीबाट अघि बढ्दै २५–२१ ले सेट आफ्नो पक्षमा पार्न सफल भयो । एपिएफका टेकराज अवस्थी केल्मी प्लेयर अफ दि म्याच घोषित भए । उनले केल्मी नेपालबाट गिफ्ट ह्याम्पर प्राप्त गरे ।

यस जितसँगै एपिएफले २ खेलबाट ६ अंक जोड्यो । पराजित सैलुङले ३ अंक जोड्यो । यो समूहबाट जावलाखेल भलिबल प्रशिक्षण केन्द्र अंकविहीन हुँदै बाहिरिएको छ ।

यससँगै पुरुषतर्फको क्वाटरफाइनल समिरकण पुरा भएको छ । अब क्वाटरफाइनलमा समूह ‘ए’ को विजेता आर्मी र समूह ‘सी’ को उपविजेता गण्डकी, समूह ‘बी’ को विजेता एपिएफ समूह ‘डी’ उपविजेता केशवलाल, समूह ‘सी’ को विजेता पुलिस र समूह ‘ए’ को उपविजेता दावाली मिलन क्लब र समूह ‘डी’ को विजेता हेल्प नेपाल र समूह ‘बी’ को उपविजेता सैलुङ बाघढुंगाबीच शुक्रबार प्रतिस्पर्धा हुनेछ ।