काठमाडौं (हाम्रो खेलकुद) – काठमाडौंमा जारी सातौैं एनभिए महिला तथा पुरुष क्लब भलिबल च्याम्पियनसिपमा पहिलो जित निकाल्दै गण्डकी प्रदेशको महिला भलिबल टोली एनभिए क्लब लिगमा छनाेट हुन सफल भएकाे छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा शुक्रबार भएको खेलमा गण्डकीले कृष्ण सेकेन्डरी एकेडेमी काभ्रेलाई ३–० को सोझो सेटमा पराजित गर्दै समूह ‘बी’ मा तेस्रो भएको छ ।

एकपक्षीय खेलमा गण्डकीले कृष्णमाथि २५–८, २५–१० र २५–५ को सहज जित निकाल्न सफल भयो । गण्डकीकी शस्मी पुन केल्मी प्लेयर अफ दि म्याच घोषित भइन् । उनले केल्मी नेपालबाट गिफ्ट ह्याम्प प्राप्त गरिन् ।

यस जितसँगै गण्डकीले आगामी बैशाखमा हुने क्लब लिगमा स्थान बनाएको छ । गण्डकीले समूह ‘बी’ मा ३ खेलबाट ३ अंक जोड्यो । कृष्ण सेकेन्डरी एकेडेमी अंक विहीन हुँदै बाहिरिएको छ । यो समूहबाट एपिएफ र आर्मी सेमिफाइनलमा पुगिसकेको छ । यि दुई टोलीले केही वेरमा आफ्नो अन्तिम खेलमा प्रतिस्पर्धा गर्दैछ । जित्ने टोली समूह विजेता बन्नेछ ।

आज पुरुषतर्फको सबै चार क्वाटरफाइनलमा प्रतिस्पर्धा हुनेछ । पहिलो क्वाटरफाइनलमा समूह ‘ए’ को विजेता आर्मी र समूह ‘सी’ को उपविजेता गण्डकी, समूह ‘बी’ को विजेता एपिएफ समूह ‘डी’ उपविजेता केशवलाल, समूह ‘सी’ को विजेता पुलिस र समूह ‘ए’ को उपविजेता दावाली मिलन क्लब र समूह ‘डी’ को विजेता हेल्प नेपाल र समूह ‘बी’ को उपविजेता सैलुङ बाघढुंगाबीच शुक्रबार प्रतिस्पर्धा हुनेछ ।