काठमाडौं (हाम्रो खेलकुद) – उपाधि दावेदार टिप टप हेल्प नेपाल स्पोर्ट्स क्लब काठमाडौंमा जारी सातौैं एनभिए महिला तथा पुरुष क्लब भलिबल च्याम्पियनसिपको सेमिफाइनलमा प्रवेश गरेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा शुक्रबार भएको खेलमा हेल्प नेपालले सैलुङ बाघढुंगा स्पोर्ट्स क्लब रामेछापलाई ३–० को सोझो सेटमा पराजित गर्दै अन्तिम चारमा स्थान पक्का गरेको हो ।

पाकिस्तानका तीन राष्ट्रिय खेलाडीसम्मिलित हेल्प नेपालले पहिलो सेट २५–२१ ले आफ्नो पक्षमा पार्न सफल भएको थियो । दोस्रो सेटमा २५–११ को एक पक्षीय जित निकाल्दै हेल्प नेपाल जितर्फ अग्रसर बन्यो । तेस्रो सेटमा हेल्प नेपालले २५–१४ को सहज जित निकाल्यो ।

हेल्प नेपालका पाकिस्तानी कप्तान मुवासार राजा केल्मी प्लेयर अफ दि म्याच घोषित भए । उनले केल्मी नेपालबाट गिफ्ट ह्याम्पर प्राप्त गरे ।

यससँगै पुरुषतर्फको सेमिफाइनल समिकरण पुरा भएको छ । अब सेमिफाइनलमा आर्मी र एपिएफ तथा पुलिस हेल्न नेपालबीच प्रतिस्पर्धा हुनेछ । महिलातर्फ पुलिस र एपिएफ तथा आर्मी र न्यु डायमण्डबीच प्रतिस्पर्धा हुनेछ । महिला र पुरुष दुवैतर्फको सेमिफाइनल शनिबार र फाइनल आइतबार हुनेछ ।