काठमाडौं (हाम्रो खेलकुद) – विभागीय भिडन्तमा त्रिभुवन आर्मी क्लबलाई पराजित गर्दै नेपाल एपिएफ क्लब सातौं एनभिए राष्ट्रिय महिला तथा पुरुष क्लब भलिबल च्याम्पियनसिपको महिलातर्फ तेस्रो भएको छ ।
आर्मीलाई ३–२ को प्रतिस्पर्धात्मक सेटमा पराजित गर्दै एपिएफले तेस्रो स्थान हासिल गरेको हो । यससँगै एपिएफले समूह चरणमा भोगेको हारको बदलासमेत लिएको छ । लिगमा एपिएफ आर्मीसँग ३–२ कै सेटमा पराजित भएको थियो ।
त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा आइतबार भएको खेलको सुरुवाती दुई सेट जितेपनि एपिएफले त्यसपछि जित निकाल्न संघर्ष गर्नुपरेको थियो । पहिलो र दोस्रो सेट क्रमशः २५–१६ र २५–२० ले जितेको एपिएफले त्यसपछिको दुवै सेट २१–२५ र २१–२५ ले गुमाउँदा खेल पाँचौं सेटमा लम्बिएको थियो ।
निर्णायक तथा पाँचौं सेटमा एपिएफले १५–७ को सहज जित निकाल्न सफल भयो । एपिएफकी निरुता ठगुन्ना केल्मी प्लेयर अफ दि म्याच घोषित भइन् । उनले केल्मी नेपालबाट गिफ्ट ह्याम्पर प्राप्त गरिन् । तेस्रो भएको एपिएफले १ लाख रुपैया प्राप्त गर्नेछन् ।
पुरुषतर्फ पनि एपिएफ नै तेस्रो भएको छ । एपिएफले पुलिसलाई ३–१ को सेटमा हराएको छ । एपिएफले पुलिसमाथि १५–२५, २५–२०, २५–२३ र २५–१८ को जित निकाल्न सफल भयो ।
महिलातर्फको फाइनलमा साविक विजेता न्यु डायमण्ड युथ स्पोर्ट्स क्लबले विभागीय नेपाल पुलिस क्लबसँग प्रतिस्पर्धा गर्दैछ । दुई टोलीबीचको फाइनल मध्यान्ह १२ बजे सुरु हुनेछ । यि दुई टोलीले समूह चरणमा प्रतिस्पर्धा गर्दा पुलिस विजयी भएको थियो ।
त्यस्तै पुरुषतर्फको फाइनलमा साविक विजेता त्रिभुवन आर्मी क्लब र साविकको उपविजेता टिप टप हेल्प नेपाल स्पोर्ट्स क्लबबीच प्रतिस्पर्धा हुनेछ । यो खेल दिउँसो २ बजे हुनेछ ।
पुरुष र महिला दुवै तर्फको च्याम्पियनले समान ४ लाख रुपैयाँसँगै उपाधि हात पार्नेछन् । दोस्रो हुनेले २ लाख रुपैयाँ प्राप्त गर्नेछन् । च्याम्पियनसिपको सर्वाेत्कृष्ट खेलाडीले २५ हजार र हरेक विधा (स्पाइकर, सेटर, ब्लकर, सर्भर, डिफेन्स र प्रशिक्षक) ले जनही १० हजार रुपैयाँ प्राप्त गर्नेछन् ।
त्यस्तै इन्टरनेट सेवा प्रदायक भाएनेटले प्रतियोगिताको विधागत उत्कृष्टलाई ३ महिना र सर्वोत्कृष्ट पुरुष र महिला खेलाडीलाई ६-६ महिनाको इन्टरनेट सेवा प्रदान गर्नेछ ।
यस्तै संघले हाम्रो खेलकुद डटकमसँग १ वर्षको लागि मिडिया राइट्स लिएको जनाएको छ । यससँगै हाम्रो खेलकुद डटकमले संघले १ वर्षभरि गर्ने विभिन्न प्रतियोगिताको प्रत्यक्ष प्रसारण गर्नेछ ।
