पोखरा (हाम्रो खेलकुद) – घरेलु टोली गण्डकी प्रदेशलाई सोझो सेटमा पराजित गर्दै होङ्गान्जी न्यु डायमण्ड युथ स्पोर्ट्स क्लबले तेस्रो टाइगर कप भलिबल प्रतियोगिताअन्तर्गत महिलातर्फ तेस्रो स्थान हासिल गरेको छ ।

पोखरा रंगशालास्थित भलिबल कोर्टमा शुक्रबार तेस्रो स्थानको लागि भएको खेलमा गण्डकीलाई २५–१९, २५–१६ र २५–१६ ले पराजित गर्दै डायमण्डले तेस्रो स्थान हासिल गरेको हो । गण्डकीले कुनै पनि समय डायमण्डलाई बलियो चुनौती पस्कन सकेन ।

यस नतिजासँगै तीन भारतीय खेलाडीसम्मिलित गण्डकी प्रतियोगितामा जितविहीन बनेको छ । गण्डकीले ५ खेल खेल्दा लिगमा ३ तथा सेमिफाइनल र तेस्रो स्थानको स्पर्धामा हार बेहोर्याे । डायमण्डले भने पाँच खेल खेल्दा तीनमा हार बेहोर्दा दुईमा गण्डकीलाई हराउन सफल भयो । डायमण्ड आफ्नो महत्वपूर्ण स्पाइकर प्रतिभा मालीविना पोखरामा खेल्न पुगेको थियो ।

तेस्रो स्थान हासिल गरेसँगै डायमण्डले १ लाख २५ हजार रुपैयाँ प्राप्त गर्नेछ । चौथो भएकाे गण्डकीले ६५ हजार प्राप्त गर्नेछन् । महिला र पुरुषतर्फको फाइनल शनिबार हुनेछ ।

महिलातर्फ उपाधिका लागि दुई विभागीय टोली साविक विजेता एपिएफ र उपविजेता आर्मीबीच प्रतिस्पर्धा हुनेछ । आज पुरुषतर्फको दुवै सेमिफाइनल हुनेछ । पहिलो सेमिफाइनलमा एपिएफ र पुलिस तथा दोस्रो सेमिफाइनलमा घरेलु टोली गण्डकी र आर्मीबीच प्रतिस्पर्धा हुनेछ ।