काठमाडौं (हाम्रो खेलकुद) – विभागीय डर्वी भिडन्तमा त्रिभुवन आर्मी क्लबलाई सोझो सेटमा पराजित गर्दै नेपाल पुलिस क्लबले छैटौं केएनपी नेरोलेक राष्ट्रिय महिला भलिबल प्रतियोगितामा तेस्रो स्थान हासिल गरेको छ ।

पुलिसले आर्मीलाई ३–० को सोझो सेटमा पराजित गर्दै तेस्रो भएको हो । यस प्रतियोगितामा पुलिसले आर्मीलाई दोस्रोपटक पराजित गरेको छ । यसअघि पुलिसले राउन्ड रोविन लिगको अन्तिम खेलमा सोमबार आर्मीलाई ३–१ को सेटमा पराजित गरेको थियो ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा मंगलबार भएको खेलको पहिलो सेटमा पुलिस २५–२१ ले विजयी भयो । दोस्रो सेटमा पनि पुलिसले २५–२१ को जित निकाल्न सफल भयो ।

तेस्रो सेटमा भने पुलिसले २५–१९ को सहज जित निकाल्न सफल भयो । पुलिसकी उषा भण्डारी प्लेयर अफ दि म्याच घोषित भइन् । उनले १० हजार रुपैयाँ र शिल्ड प्राप्त गरिन् ।

तेस्रो भएसँगै पुलिसले ७५ हजार रुपैयाँ प्राप्त गरेको छ । आज नै उपाधिका लागि होङ्गान्जी न्यु डायमण्ड युथ स्पोर्ट्स क्लब र विभागीय नेपाल एपिएफ क्लबबीच प्रतिस्पर्धा हुँदैछ । यि दुई टोलीले राउन्ड रोविन लिगमा प्रतिस्पर्धा गर्दा डायमण्डले ३–१ को सेटमा जित निकालेको छ ।

माघ २१ गतेबाट सुरु भएको प्रतियोगितामा तीन विभागीय टोलीसहित चार टोलीको सहभागिता रहेको छ । विजेताले ३ लाख रुपैयाँ र शिल्ड प्राप्त गर्नेछ । उपविजेताले १ लाख ५० हजार र तेस्रो हुने टोलीलाई ७५ हजार रुपैयाँ नगद पुरस्कार पाउनेछन् । सर्वोत्कृष्ट खेलाडीलाई ५० हजारसँगै अन्य आकर्षक पुरस्कार प्रदान गरिनेछ ।

विधागततर्फ उत्कृष्ट हुनेलाई जनही १५ हजार र हरेक खेलको प्लेयर अफ दी म्याचलाई १० हजार रुपैयाँ नगद पुरस्कार प्रदान गरिनेछ यस्तै एक नयाँ खेलाडीलाई नगद १५ हजारसहित इमर्जिङ प्लेयर अवार्डबाट सम्मानित गरिनेछ ।