बुटवल (हाम्रो खेलकुद) – जिल्ला भलिबल स्याङ्जाले आठौं संस्करणको मणिमुकुन्द रनिङकप अन्तर जिल्ला पुरुष भलिबल प्रतियोगिताको उपाधि जितेको छ ।

तिलोत्तमा–२ स्थित क्लबको खेल मैदानमा शनिबार भएको फाइनलमा जिल्ला भलिबल संघ नवलपुरलाई ३–१ को सेटमा पराजित गर्दै स्याङ्जाले उपाधि जित्न सफल भएको हो । स्याङ्जाले सुरुवाती सेट गुमाएपनि त्यसको तीनै सेट आफ्नो पक्षमा पार्दै उपाधि जित्न सफल भएको हो ।

स्याङ्जाले पहिलो सेट २५–२३ ले गुमाएको थियो । दोस्रो सेटमा २५–१३ को सहज जित हात पार्दै खेलमा फर्किएको स्याङ्जाले तेस्रो सेटमा पछि परेको स्थिति उल्ट्याएर २५–२३ को जित निकाल्यो । त्यसपछि चौथो सेटमा स्याङ्जा २५–१६ ले विजयी हुन सफल भयो । स्याङ्जा पाँचौपटक च्याम्पियन बन्न सफल भएको हो

उपाधिसँगै स्याङ्जाले मणिमुकुन्दारनिङ शिल्डसहित १ लाख ५० हजार, कप, मेडल र प्रमाणपत्र प्राप्त गरेको छ । उपविजेता नवलपुरले १ लाख रुपैयाँसहित कप, मेडल र प्रमाणपत्र प्राप्त गरेको छ ।

यस्तै गुल्मीलाई २४–२६, २५–१६, २५–१८ र २५–२१ ले पराजित गर्दै पर्वतले तेस्रो स्थान हासिल गरेको छ । तेस्रो भएको पर्वतले ५० हजार तथा चौथो भएको गुल्मीले ३० हजार रुपैयाँ हात पारेको छ ।

स्याङ्जालाई च्याम्पियन बनाउन महत्वपूर्ण भुमिका निभाएका ओपन स्पाइकर सन्जु विक्रम शाह प्रतियोगिताको सर्वाेत्कृष्ट खेलाडी घोषित भएका छन् । उनले १० हजार रुपैयाँसँगै ट्रफी प्राप्त गरे । विधागततर्फ पनि च्याम्पियन स्याङ्जाले वर्चश्व जमाएको छ ।

माघ २४ गतेबाट शुरु भएको प्रतियोगितामा सहभागी ९ जिल्लालाई चार समूहमा विभाजन गरिएको थियो । हरेक समूहका शीर्ष दुई टोली क्वाटरफाइनलमा पुगेका थिए ।

मणिमुकुन्द रनिङ कपको उत्कृष्ट

सर्वाेत्कृष्ट – सन्जु विक्रम शाह (स्याङ्जा)
स्पाइकर – अशोक श्रेष्ठ (नवलपुर)
सेटर – सुवास कुँवर (पर्वत)
ब्लकर – सन्तोष राना (नवलपुर)
सर्भर – विजय थापा (स्याङ्जा)
लिवेरो – राजन दर्लामी मगर (स्याङ्जा)
प्रशिक्षक – अमृत केसी (स्याङ्जा)
अनुशाषित खेलाडी – सुदिप राना (स्याङ्जा)