काठमाडौं (हाम्रो खेलकुद) – एसियन एथलेटिक्स एसोसिएसनको तत्वाधान तथा नेपाल एथलेटिक्स संघको आयोजनामा १६ औं संस्करणको एसियन क्रस कन्ट्री च्याम्पियनसिप यसै महिना नेपालमा आयोजना हुने भएको छ ।

एथलेटिक्स संघले आइतबार पत्रकार सम्मेलन गर्दै च्याम्पियनसिप फागुन २३ गते गोकर्णस्थित गोकर्ण फरेस्ट रिसोर्टमा हुने जानकारी गराएको छ । यो च्याम्पियनसिप २२ वर्षपछि नेपालमा आयोजना हुन लागेको हो ।

यसअघि नेपालले सन् २००१ मा क्रस कन्ट्रीको छैटौं संस्करण आयोजना गरेको थियो । त्यति बेला नेपालले जुनियर महिलातर्फ कास्य पदक जितेको थियो । यसअघि सन् २०११ मा पनि च्याम्पिसिप आयोजनाको प्रयास भएपनि सफल भएको थिएन ।

यसपटक च्याम्पियनसिपमा नेपालसहित एसियाका ३० देखि ४० राष्ट्रका करिव ४ सय ५० खेलाडीसहित राष्ट्रिय तथा अन्तर्राष्ट्रिय प्राविधिक एवम् सहयोगी समेत गरि प्रत्यक्ष रुपमा करिव ६ सय ५० जनाको सहभागिता रहने संघका अध्यक्ष राजीव विक्रम शाहले जानकारी गराए ।

च्याम्पियनसिपमा सिनियर पुरुष र महिलातर्फ १० किमि, २० वर्ष मुनिका जुनियर पुरुषतर्फ ८ किमि र २० वर्ष मुनिका जुनियर महिलातर्फ ६ किमि गरी कूल ४ विधामा व्यक्तिगत र टिम ईभेन्टसहरुमा प्रतिस्पर्धा हुने बताइएको छ । नेपालले चारै विधामा सहभागिता जनाउने अध्यक्ष शाहले बताए ।

यस च्याम्पियनसिपमा नेपालबाट सहभागिता जनाउने खेलाडीका लागि फागुन ९ गते छनोट हुने र त्यसपछि बन्द प्रशिक्षणमा राखिने एथलेटिक्सका मुख्य प्रशिक्षक चन्द्र गुरुङले जानकारी दिए । उनका अनुसार छनोट भएका खेलाडीलाई झन्डै १० दिन बन्द प्रशिक्षणमा राखिनेछ ।

च्याम्पियनसिप सफल पार्नको लागि मूल आयोजक समिति, सचिवालय टिमसहित विभिन्न ७ वटा समितिहरु गठन गरिएको संघले जनाएको छ । यस च्याम्पियनसिप आयोजना गर्न नेपाल सरकार, राष्ट्रिय खेलकुद परिषद र प्रदेश खेलकुद विकास परिषद बागमती प्रदेश र विभिन्न प्रदेशसँगै संघ संस्थाको सहयोग रहने संघले जनाएको छ ।

च्याम्पियनसिपको अनुमानित बजेट तीन करोड ६५ लाख ५५ हजार पाँच सय रुपैया रहेको छ । च्याम्पियनसिपका लागि बागमती प्रदेश सरकारबाट ३० लाख रुपैयाँ विनियोजन भइसकेको बागमती प्रदेश खेलकुद विकास परिषद्का सदस्य सचिव सूर्यलाल भण्डारीले जानकारी दिए । यस्ता अन्तर्राष्ट्रिय प्रतियोगिता आयोजनाले खेलको विकास मात्र नभई पर्यटन प्रबद्र्धनमा पनि टेवा पुग्ने भएकाले प्रदेश खेलकुदले पयर्टकिय खेलकुदमा बढी जोड दिएको सदस्य सचिव भण्डारीले बताए ।