काठमाडौं (हाम्रो खेलकुद) – आयोजक न्यू डायमण्ड युथ स्पोर्ट्स क्लबल बागमती प्रदेश न्यू डायमण्ड कप यू–१८ खुल्ला राष्ट्रिय महिला भलिबल च्याम्पियनसिपको उपाधि जितेको छ ।

डायमण्डले शनिबार भएको फाइनलमा एभरेस्ट मावि बुटवललाई ३–१ को सेटमा पराजित गर्दै उपाधि जित्न सफल भएको हो ।
पुरानो नैकापस्थित न्यु डायमण्डको निर्माणधीन कोर्टमा डायमण्डले पहिलो र दोस्रो सेटमा २५–१९, २५–२० को जित निकालेको थियो ।

तेस्रो सेट २१–२५ ले गुमाएको डायमण्डले प्रतिस्पर्धात्मक बनेको चौथो सेटमा २६–२४ को जित निकाल्दै च्याम्पियन बन्न सफल भयो । उपाधिसँगै च्याम्पियन डायमण्डले ५ लाख रुपैया, ट्रफी मेडल र प्रमाणपत्र प्राप्त गरेको छ ।

दोस्रो भएको एभरेस्टले २ लाख ५० हजार, ट्रफी, मेडल र प्रमाणपत्र प्राप्त गरेको छ । शनिबारै धादिङले ब्राइट फ्युचर मावि सलकपुर मोरङलाई २५–१०, २५–१३ र २५–६ ले पराजित गर्दै तेस्रो स्थान हासिल गरेको छ ।

तेस्रो भएको धादिङ स्पोर्ट्स क्लबले १ लाख, ट्रफी, मेडल र प्रमाणपत्र प्राप्त गरेको छ । चौथो भएको ब्राइट फ्युचर मावि मोरङले ५० हजार रुपैया प्राप्त गरेको छ ।

च्याम्पियनसिप आयोजना गराउनुको मुख्य उद्देश्य क्लबको निर्माणधीन खेल मैदान निर्माण सहयोगार्थ तथा जुनियर स्तरबाटै खेलाडी उत्पादनको लागि रहेको क्लबले जनाएको छ ।