काठमाडौं (हाम्रो खेलकुद) – नेपाल राष्ट्रिय तथा अन्तर्राष्ट्रिय खेलाडी संघ (एनएनआइपिए) को आयोजनामा चैत तेस्रो साता १७औं एनएनआइपिए स्पोर्ट्स अवार्ड हुने भएको छ ।

आयोजक एनएनआइपिएले बुधबार प्रेस विज्ञप्ति जारी गर्दै एनएनआइपिए स्पोर्ट्स अवार्ड चैत १७ गते हुने जानकारी गराएको छ ।

वर्ष २०७८ मा राष्ट्रिय तथा अन्तर्राष्ट्रिय स्तरका अफिसियल खेलकुद प्रतियागिताहरु नभएको हुदा यसवर्ष नेपाल ओलम्पिक कमिटीबाट आधिकारिकता प्राप्त २७ खेलहरुलाई आधार मानी सम्बन्धित संघले सिफारिस गरिएका खेलाडीहरुलाई सम्मान गर्ने एनएनआइपिएले जनाएको छ ।

विगतका केही वर्षदेखि यो अवार्ड कार्यक्रम उपत्यकाको काठमाण्डौ, ललितपुर तथा भक्तपुरलगायतका विभिन्न ऐतिहासिक, सांस्कृितक सहरहरुमा आयोजना भइसकेकोमा यसपटक काठमाडौंमा हुने आयोजकले जनाएको छ ।

२७ खेलका उत्कृष्ट खेलाडीलाई १० हजार रुपैयाँ प्रदान गरिनेछ । २७ उत्कृष्ट खेलाडीमध्येबाट एक जना पुरुष र एक जना महिला खेलाडीलाई सर्वाेत्कृष्ट खेलाडी घोषण गरिनेछ । उनीहरुलाई १ लाख रुपैयाँ र सम्मानपत्र प्रदान गरिनेछ ।

एक पुरुष र एक महिला प्रतिभाशाली खेलाडीलाई ५० हजार रुपैयाँ र सम्मानपत्र प्रदान गरिनेछ । एक जना पाका खेल व्यक्तिलाई गजराज आदर्श खेल व्यक्तित्वबाट सम्मानसँगै ३५ हजार रुपैयाँ प्रदान गरिनेछ ।

एक खेल पत्रकारलाई एनएनआइपिए खेल पत्रकारिता पुरस्कारबाट २५ हजार रुपैयाँ र सम्मानपत्रले सम्मानित गरिनेछ । एक जना पारा खेलाडीलाई वर्ष उत्कृष्ट पारा खेलाडी अवार्डसँगै १५ हजार रुपैयाँ प्रदान गरिने आयोजकले जनाएको छ ।

एनएनआइपिए नेपाली खेलाडीको छाता संगठन हो । यसले खेलाडीको हकहित, संरक्षण, खेलाडीहरुको प्रोत्साहन तथा वृतिविकासमा प्रतिवद्धताका साथ लागिरहेको छ ।