काठमाडौं (हाम्रो खेलकुद) – हिमाल अधिकारी र विमला कार्कीले स्वस्तिश्री गुरुकुल आईवी वल्र्ड स्कुलले आयोजना गरेको ‘रन फर नेसनलपिस’ रोड रेसको उपाधि जितेका छन् ।

प्रतियोगितामा १६ वर्ष मुनिको छात्र र छात्राको दुई समुह गरी प्रतिस्पर्धा गराइएको थियो । छात्रतर्फ पाँच किलोमिटर र छात्रातर्फ तीन किलोमिटरमा प्रतिस्पर्धा भएको थियो ।

छात्रतर्फ हिमाल अधिकारी पहिलो भए । दिपेन्द्र बोहोरा दोस्रो भए । सनम शेर्पा तेस्रो भए । बादल कार्की, हस्त सुनार, चक्का रोकाय, रोहित बोटे, गौतम राई, सुजल स्याङ्तान र रोशन श्रेष्ठ क्रमशः चौथो देखि १०औं भए ।

छात्रा ३ किमीतर्फ विमला कार्की पहिलो, डोमा बुढा दोस्रो तथा ओहाना कार्की तेस्रो भइन् । अनुसिया तण्डुकार, आइस्मा आचार्य, अस्मिता थापा, आयुशा राई, भावना नाथ, मनिता लामा र मीना घर्ती मगर क्रमशः चौथो देखि १०औं भइन् ।

छात्र–छात्र दुवैतर्फको पहिलो हुनेले २५ हजार, दोस्रो हुनेले २० हजार, तेस्रो हुनेले १५ हजार र चौथो हुनेले ५ हजार रुपैयाँ, मेडल, ट्रफी र प्रमाण पत्र प्राप्त गरे ।

विजयी खेलाडीलाई बैकुण्ठ मानन्धर, बाग्मती प्रदेशका सांसद् तथा स्कुलका संस्थापक अध्यक्ष रामकृष्ण चित्रकार, विद्यालयकी प्रबन्ध निर्देशक मीना महर्जन चित्रकार, नागार्जुन नगरपालिका वडा नं.२ का वडा अध्यक्ष थुमराज केसी, नेपाल ओलम्पिक कमिटीका महासचिव निलेन्द्रराज श्रेष्ठ, प्याव्सनका अध्यक्ष डिके ढुंगाना, एथलेटिक्स परिवार नेपालका अध्यक्ष राजन खत्री, विद्यालयकी प्रिन्सिपल नेहा केसी, वुद्धवीर लामा, विद्यालयका फुटवल एम्बासडर अनिल गुरुङलगायतले पुरस्कृत गरे ।

कीर्तिमानी धावक बैकुण्ठ मानन्धरले उद्घान गरेको रोड रेसमा विभिन्न स्कुलका करिव २ सय ४६ जना छात्र र छात्राले सहभागिता जनाएका थिए ।