काठमाडौं (हाम्रो खेलकुद) – आगामी जेठ पहिलो सातादेखि नेपालमा आयोजना हुने सेन्ट्रल एसियन भलिबल एसोसिएसन (काभा) वुमन्स भलिबल च्यालेन्ज कपमा ८ राष्ट्रको सहभागिता रहने भएको छ ।

आयोजक नेपाल भलिबल संघले शुक्रबार राजधानीमा पत्रकार सम्मेलनको आयोजना गर्दै दक्षिण एसिया र सेन्ट्रल एसियाका राष्ट्रसम्मिलित च्यालेन्ज कपमा आयोजक नेपालसहित विभिन्न ८ टोलीको सहभागिता रहने जानकारी गराएको छ । यसैबीच संघले च्यालेन्ज कपको लोगो सार्वजनिक गरेको छ ।

च्यालेन्ज कपमा दक्षिण एशियाबाट आयोजक नेपालसहित बंगलादेश, माल्दिभ्स, भारत, श्रीलंका तथा सेन्ट्रल एसियाबाट किर्गिस्तान, उज्वेकिस्तान र काजकिस्तानको सहभागित रहने पक्का भएको नेपाल भलिबल संघका अध्यक्ष जितेन्द्र बहादुर चन्दले जानकारी गराए । च्यालेन्ज कप जेठ ६ गते शनिबारबाट जेठ १५ गते सोमबारसम्म हुनेछ ।

संघले नेपाल भलिबल संघको निति अनुरुप राष्ट्रिय महिला तथा पुरुष भलिबल टिम निर्माण गरी राष्ट्रिय एवं अन्तर्राष्ट्रिय प्रतियोगिताहरुमा सहभागी गराउने र प्रतियोगिता पनि आयोजना गराउने उद्देश्य अनुरुप पहिलो प्रतियोगिताको रुपमा काभा वुमन्स च्यालेन्ज कप हुनेछ ।

च्यालेन्ज कपका लागि नेपालले फिभको सहयोगमा बेल्जियमका अनुभवी प्रशिक्षक जान डे ब्रान्डलाई मुख्य प्रशिक्षकमा नियुक्त गरिसकेको छ । यसै साता नेपाल आइपुगेका उनले प्रशिक्षण पनि सुरु गरिसकेका छन् । प्रारम्भिक चरणमा २१ खेलाडी राष्ट्रिय टोलीको प्रशिक्षण्मा रहेका छन् ।

उक्त च्यालेन्ज कप आयोजना गर्न अनुमानित बजेट २ करोड ५० लाख रुपैयाँ रहेको संघले जनाएको छ । त्यसका लागि संघले विभिन्न संघसंस्थाहरुसँग प्रायोजनलगायत विभिन्न प्रकारका सहयोगको लागी आह्वान गरिसकेको जनाएको छ ।

राष्ट्रिय खेलकुद परिषद (राखेप) का सदस्य सचिव टंकलाल घिसिङले वुमन्स च्यालेन्ज कपका लागि राखेपको पूर्ण सहयोग रहने बताएको छ । सदस्य सचिव घिसिङले च्यालेन्ज कप आयोजनाका लागि ५० लाख, मुख्य प्रायोजक नपाएको अवस्थामा प्रायोजन रकम, कभर्ड हल मर्मत तथा सम्भारसँगै राष्ट्रिय टिम तयारीको लागि छुट्टै बजेट प्रदान गरिने घोषणा गरे ।

यस्तै सदस्य सचिव घिसिङले भलिबलको अन्तर्राष्ट्रिय कभर्ड हल निर्माणको लागि मध्यपुर र कागेश्वरी मनोहरा नगरापालिकामा जग्गा प्राप्ति भइसकेको र आगामी आर्थिक वर्षबाट त्यहाँ काम हुने बताए । यस्तै सदस्य सचिव घिसिङले नेपाललाई लगातार च्याम्पियन बनेर स्वर्णमा ह्याट्रिक गर्नको लागि शुभकामना प्रदान गरे ।

सदस्य सचिव घिसिङकै निर्देशनमा राखेपस्थित कर्मड हलको चेन्जिङ रुम, शौचालय, हलको बत्ती व्यवस्थापन, पार्केटिङ, ढल निकास, रंग रोगन लगायत विभिन्न कामहरुको मर्मत शुरु भईसकेको संघले जनाएको छ ।