काठमाडौं (हाम्रो खेलकुद) – दिल बहादुर कन्दङ्वा र विवेक कन्दङ्वाको जोडीले एक दिने बृहत् जनजाति कप ब्याडमिन्टन महोत्सवको उपाधि जितेको छ ।

ललितपुरको लगनखेलस्थित रिभाइभ लिजरपार्कको ब्याडमिन्टन हलमा शनिबार भएको एक दिने पुरुष डबल्समा विकास महर्जन र रत्न महर्जनको जोडीलाई २–१ को सेटमा पराजित गर्दै दिल र विवेकको जोडीले उपाधि जित्न सफल भएका हुन् ।

पहिलो सेट १७–२१ ले गुमाएको दिल र विवेकको जोडीले त्यसपछिको दुवै सेट २१–१९ र २१–१६ ले आफ्नो पक्षमा पार्दै उपाधि जित्न सफल भयो । राम राई र प्रकाश राईको जोडी तथा रदिप महर्जन र दिपेन महर्जनको जोडी संयुक्त रुपमा तेस्रो भए ।

उपाधिससँगै दिल र विवेकको जोडीले ट्रफी, मेडल र प्रमाणपत्र प्राप्त गरेको छ । दोस्रो र तेस्रो भएको जोडीले पनि ट्रफीसँगै , मेडल र प्रमाणपत्र पाएको छ । पहिलो, दोस्रो र तेस्रो हुने जोडीलाई योनेक्सले गिफ्ट ह्याम्पर पनि प्रदान गरेको छ ।

विजयी टोली तथा खेलाडीलाई पुर्व मन्त्री शेर बहादुर तामाङ, पाख्रिन तामाङ समाजका अध्यक्ष शुक्र पाख्रिन, ब्याडमिन्टनका मुख्य प्रशिक्षक सुदिप योन्जन लगायतले पुरस्कृत गरे ।

पाख्रिन तामाङ समाजको आयोजनामा भएको एक दिने बृहत् जनजाति कप ब्याडमिन्टन महोत्सवमा विभिन्न १८ टोलीको सहभागिता रहेको थियो ।

समाजले आदिवासी जनजाति समुदायमा सुचिकृत जाति विशेष टिमको आधारमा प्रतियोगिता गराएको हो । एक टोलीमा रहने दुई खेलाडीको उमेर जोड्दा कम्तीमा ८० वर्ष पुगेको हुनुपर्ने मापदण्ड राखिएको थियो ।

सोही प्रतियोगिता दौरान समाजले नेपाली बक्सिङको इतिहासमा ऐतिहासिक रजत पदक जित्न सफल युवा उदियमान बक्सर सुष्मा तामाङलाई नगद १० हजार रुपैयाँ र सम्मानपत्रले सम्मानित गरेको छ । उनलाई समाजका अध्यक्ष शुक्र पाख्रिनले सम्मानपत्र प्रदान गरे ।

सुष्माले थाइल्यान्डको बैंककमा गत माघमा भएको एएसबीसी एसियन यू–२२ बक्सिङ च्याम्पियनसिप अन्तरगता महिला ४५ देखि ४८ केजी तौल समूहमा ऐतिहासिक रजत पदक जित्न सफल भएकी थिइन् । सुष्मा फाइनलमा उज्वेकिस्तानकी फोजिलोभा फरजोनासँग अंकका आधारमा ५–० ले पराजित हुँदै रजतमा सीमित बनेकी थिइन् ।

एसियालीस्तरमा कुनैपनि उमेर समूहमा नेपाली बक्सिङ खेलाडीले रजत जितेको त्यो पहिलोपटक हो । यसअघि, एसियन गेम्समा नेपाली खेलाडीले कास्यपदक जितेका थिए । त्यसबेला सुष्माले पहिलो खेलमा भियतनाम र दोस्रो खेलमा मंगोलियाकी खेलाडीलाई पराजित गर्दै फाइनलमा पुगेकी थिइन् । उज्वेकिस्तानकी फोजिलोभा एसियन च्याम्पियन हुन् ।