ललितपुर (हाम्रो खेलकुद) – विभागीय टोलीद्धय त्रिभुवन आर्मी क्लब र नेपाल पुलिस क्लब ललितपुरमा जारी मेयर कप खुल्ला महिला तथा पुरुष भलिबल प्रतियोगिताको पुरुषतर्फ फाइनलमा प्रवेश गरेको छ ।

आर्मीले एपिएफलाई तथा पुलिसले आयोजक ललितपुर महानगरपालिकालाई पराजित गर्दै फाइनलमा भेट पक्का गरेको हो ।
ललितपुरको जावलाखेलस्थित जावलाखेल भलिबल प्रशिक्षण केन्द्रको कभर्डहलमा शुक्रबार भएको पहिलो सेमिफाइनलमा आर्मीले एपिएफमाथि ३–१ को जित निकाल्दै फाइनलमा पुग्न सफल भयो ।

पहिलो सेट २७–२५ ले गुमाएको आर्मीले त्यसपछिको तीनै सेट २५–१९, २५–१५ र २५–१९ ले आफ्नो पक्षमा पार्न सफल भयो । यस जितसँगै आर्मीले एपिएफसँगको पछिल्लो दुई प्रतियोगितामा भोगेको हारको बदला लिन सफल भएको छ । आर्मी पछिल्लोपटक ढोरपाटन भलिबल र पोस्ट बहादुर बोगटी भलिबलमा एपिएफसँग पराजित भएको थियो ।

दोस्रो सेमिफाइनलमा पुलिसले ललितपुर महानगरपालिकामाथि २५–१५, २५–११ र २५–१५ को सोझो सेटमा जित निकाल्दै फाइनलमा आर्मीसँगको भेट पक्का गर्यो । फाइनल शनिबार हुनेछ । एपीएफ र ललितपुरबीच तेस्रो स्थानको लागि शनिबारै प्रतिस्पर्धा गर्नेछ ।

महिलातर्फको फाइनलमा शनिबार नै एपीएफ क्लब र नेपाल पुलिस क्लबबीच प्रतिस्पर्धा हुनेछ महिलातर्फ होङ्गान्जी न्यु डायमण्ड युथ स्पोर्ट्स क्लबलाई २५–२०, २५–२२ र २५–२२ को सोझो सेटमा हराएर त्रिभुवन आर्मी क्लबले तेस्रो स्थान हासिल गरेको छ ।

ललितपुर महानगरपालिकाको आयोजना र जावलाखेल भलिबल प्रशिक्षण केन्द्रको ब्यवस्थापन रहेको १६ बैशाखसम्म चल्ने प्रतियोगितामा पुरुषतर्फ ८ र महिलामा ७ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ । लिगकम नकआउटका आधारमा हुने प्रतियोगिताको शीर्ष दुई टोली सेमिफाइनलमा पुग्नेछन् ।

विजेताले समान २ लाख, उपविजेताले १ लाख र तेस्रो हुनेले ५० हजार रुपैयाँ पुरस्कार प्राप्त गर्नेछन् । सर्वोत्कृष्ट खेलाडीलाई जनही १० हजार र विधागततर्फको उत्कृष्ट खेलाडीलाई जनही ५ हजार रुपैयाँ दिईने आयोजकले जनाएको छ ।