काठमाडौं (हाम्रो खेलकुद) – नेपाल भलिबल संघले चीनमा आयोजना हुने १९औं एसियाली खेलकुद (एसियाड) र किर्गिस्तानमा हुने काभा पुरुष भलिबल नेसन्स लिगका लागि गरेको खुल्ला छनोटमा ३६ खेलाडी सहभागी भएका छन् ।

संघले खुल्ला छनोटमार्फत पुरुष राष्ट्रिय टोली तयार गर्न लागेको हो । खुल्ला छनोटको पहिलो दिन विभिन्न क्लब तथा प्रदेशबाट गरी कुल ३६ खेलाडी समावेश भएको संघले जनाएको छ । खुल्ला छनोट त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा २३ बैशाखसम्म चल्नेछ ।

छनोटमा राष्ट्रिय टोलीका कप्तान तथा सेटर इम बहादुर रानासँगै यसअघि टोलीका सदस्य रहिसकेका लिबेरो ईश्वर थापा मगर सहभागी छैनन् ।

यसै छनोटमार्फत राष्ट्रिय टोलीको निर्माण गरिनेछ । खुल्ला छनोटमा प्रशिक्षक जगदिश प्रसाद भट्ट र अर्का प्रशिक्षक भरत यादवले खेलाडी छनोट गरिरहेका छन् । नेपाली पुरुष भलिबल टोलीले यस वर्ष १९औं एसियाली खेलकुदसँगै काभा पुरुष भलिबल नेसन्स लिग खेल्ने तय छ ।

किर्गिस्तानमा काभा पुरुष नेसन्स लिग असार ३ गते देखि १० गते सम्म हुनेछ । एसिया चीनको हाङझावमा असोज ६ गतेदेखि २१ गते सम्म हुँदैछ । सेन्ट्रल एसियन भलिबल एसोसिएसन (काभा) पुरुष भलिबल नेसन्स लिगमा नेपालसहित ७ टोलीको सहभागिता रहने भएको छ । काभामा नेपालसँगै आयोजक किर्गिस्तान, पाकिस्तान, उज्वेकिस्तान, काजकिस्तान, इरान र तुर्किमिनिस्तान रहेका छन् ।

प्रशिक्षणमा सहभागी भएका खेलाडी ३६ खेलाडीको नामावली

आउट साइड हिटर – मान बहादुर श्रेष्ठ, धन बहादुर भट्ट क्षेत्री, बिशाल विक, उत्तम चन्द, रविन चन्द, रवि केसी, धिरोज काजी बस्नेत, टेक राज अवस्थी, धनपति, अमृत विक र सरण कार्की

अपोजिट हिटर – राजेन्द्र विष्ट, सरण सामरी क्षेत्री, हेमन्त मल्ल, अमिर थापा, सरोज चम्लागाईं, प्रेम गौतम र राज कुमार निरौला

सेटर – हरि हजुर थापा, दुर्गा महतो, अभिषेक थापा, सम्राट भण्डारी र लोकेन्द्र गिरी

मिडल ब्लकर – दुर्गा बहादुर खड्का, हरि बहादुर अधिकारी, सन्तोष महता, सफल विक, रविन नगरकोटी, सरोज बोहोरा र मनिष मानन्धर

लिबेरो – भरत चुनारा, नरेन सिन्जाली, हृदेश प्रसाद चौधरी, विनोद चन्द, अभिषेक थिङ तामाङ र भीम गाहा