काठमाडौं (हाम्रो खेलकुद) – उपाधि दावेदार भारतले एनएससी काभा महिला भलिबल च्यालेन्ज कपमा सानदार विजयी सुरुवात गरेको छ ।

भारतले तुलनात्मक रुपमा कमजोर प्रतिद्धन्द्धी बंगलादेशमाथि ३–० को सोझो सेटमा जित निकाल्दै विजयी सुरुवात गरेको हो ।त्रिपुरेश्वरस्थित राष्ट्रिय खेलकुदक परिषद (राखेप) को कभर्डहलमा सोमबार भएको दोस्रो खेलमा भारतले बंगलादेशमाथि एकपक्षीय प्रदर्शन गर्दा २५–३, २५–९ र २५–६ को सहज आत्मसात् गर्यो ।

यस सानदार जितसँगै भारतले समूह ‘ए’ मा ३ अंक जोडेको छ । बंगलादेश अंक विहीन छ । आज नै यही समूहमा घरेलु टोली नेपालले किर्गिस्तानसँग खेल्दै च्यालेन्ज कपको सुरुवात गर्दै छ । खेल दिउँसो ४ः३० बजेपछि हुनेछ ।

आज नै उज्वेकिस्तानले श्रीलंकामाथि ३–० को सोझो सेटमा जित निकाल्दै विजयी सुरुवात गरिसकेको छ । आज लिगको अन्तिम खेलमा साँझ ७ बजे माल्दिभ्स र काजकस्तानबीच खेल हुँदैछ ।

च्यालेन्ज कपमा ८ राष्ट्रको सहभागिता रहेको छ । सहभागी टोलीलाई दुई समूहमा विभाजन गरिएको छ । सात दिने प्रतियोगिताको सुरुवाती तीन दिन ४ खेल र बाँकी ४ दिन दुई खेल हुनेछन् ।

नेपालले जेठ ९ गते बंगलादेशसँग र जेठ १० गते भारतसँग खेल्नेछ । समूह एमा नेपालसँगै भारत, बंगलादेश र कीर्गिस्तान रहेको छ । अर्को समूहमा उज्वेकिस्तान, श्रीलंका, माल्दिभ्स र काजकास्तान रहेका छन् ।

दुई समूहको राउन्ड रोविन लिगपछि शीर्ष २ टोलीले सेमिफाइनलमा र पुछारमा रहेका दुई टोलीले वरियताका लागि प्रतिस्पर्धा गर्नेछन् । च्यालेन्ज कपमा कुल २० खेल हुनेछ ।

खेलको पूरा भिडियो वहाँ हेर्नुहोस् :