काठमाडौं (हाम्रो खेलकुद) – काठमाडौंमा जारी एनएससी काभा महिला भलिबल च्यालेन्ज कपमा आज (शुक्रबार) सेमिफाइनलका खेलहरु हुनेछन् ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा भारत र उज्वेकिस्तान तथा घरेलु टोली नेपाल र काजकस्तानबीच सेमिफाइनल खेल हुनेछ । भारत र उज्वेकिस्तानको खेलमा दिउँसो २ः३० बजे तथा नेपाल र काजकस्तानबीचको खेल साँझ ५ बजेपछि हुनेछ ।

लगातार तेस्रोपटक उपाधि जितेर ह्याट्रिकको लक्ष्यमा रहेको नेपालले उपाधि जित्ने सम्भावना कायम राख्न काजकस्तानलाई पराजित गर्नुपर्नेछ । काजकस्तानसँग पराजित भए नेपालको उपाधि लक्ष्यसँगै दोस्रो स्थान पनि गुम्नेछ । सेमिफाइनलमा पराजित भए नेपालले तेस्रो स्थानको लागि खेल्नुपर्नेछ ।

कप्तान अरुणा शाही, सरस्वती चौधरी र सलिना श्रेष्ठ टोलीको सबैभन्दा अनुभवी खेलाडी हुन् । प्रशिक्षण दौरान घुँडाकै चोटका कारण सरस्वती पूर्णरुपमा फिट छैनन् ।

उषा भण्डारीसँगै निरुता ठगुन्ना, साफिया पुन, संगम महतो र सलिना श्रेष्ठले भारतविरुद्ध उच्च प्रदर्शन गरेपनि टोलीलाई जिताउन पर्याप्त रहेन । प्रतियोगिताअघि ठूला टोलीसँग अभ्यास खेल खेल्न नपाउँदा भारतविरुद्ध एक्सपोजरको कमी प्रष्टै देखिएको थियो ।

भारतविरुद्धको खेलमा गरेको गल्ती काजकस्तानविरुद्ध नदोहो¥याउने नेपालको लक्ष्य छ । घरेलु टोली नेपाल भने समूह ‘ए’ भारतसँग पराजित भएपछि उपविजेता बनेको थियो ।

कीर्गिस्तान र बंगलादेशलाई सोझो सेटमा हराएको नेपाल भारतसँग ३–१ को सेटमा पराजित भएको थियो । समूह चरणको तीन खेलमा ७ सेट जितेको नेपालले ३ सेट गुमाएको छ ।

यता, काजकस्तान घरेलु टोली नेपाललाई पराजित गर्दै नेपालको ह्याट्रिक उपाधि जित्ने लक्ष्यलाई चक्नाचुर पार्न चहान्छ । काजकस्तान यस च्यालेन्ज कपको सबैभन्दा बलियो टोली हो ।

समूह ‘बी’ को विजेता बनेर सेमिफाइनलमा पुगेको काजकस्तानले समूह चरणको तीन खेलमा ९ सेट जित्दा दुई सेट गुमाएको छ ।

माल्दिभ्सलाई सोझो सेटमा हराएको काजकस्तानले श्रीलंका र उज्वेकिस्तानसँग समान एक सेट गुमाएको थियो । एसियाको शीर्ष पाँचौ वरीयतामा रहेको काजकस्तानसँग युवा खेलाडीको बाहुल्यता रहेको छ ।

नेपाल र काजकस्तानले खेल्नुअघि भारतले उज्वेकिस्तानसँग खेल्नेछ । दुवै टोली जित निकाल्दै फाइनल पुग्ने लक्ष्यमा हुनेछ ।