काठमाडौं (हाम्रो खेलकुद) – सुरुवाती सेट गुमाएपनि त्यसपछि सानदार प्रदर्शन गर्दै नेपालले एनएससी काभा महिला भलिबल च्यालेन्ज कपमा तेस्रो स्थान हासिल गरेको छ ।

त्रिपुेश्वरस्थित राष्ट्रिय खेलकुद परिषद (राखेप) को कभर्डहलमा आइतबार भएको खेलमा नेपालले उज्वेकिस्तानलाई ३–१ को सेटमा पराजित गर्दै तेस्रो स्थान हासिल गरेको हो ।

पहिलो सेट २०–२५ ले गुमाएको नेपालले त्यसपछिको तीनै सेट आफ्नो पक्षमा पार्न सफल भयो । एक सयम ६–८ ले पछि रहेको नेपालले पूनरागमन प्रयास गरेपनि जित निकाल्न सकेन । पहिलो सेट गुमाएको नेपालले त्यसपछि भने आफ्नो लय समात्यो ।

दोस्रो सेट नेपालले २५–१६ ले सहजै आफ्नो पक्षमा पार्न सफल भयो । प्रतिस्पर्धात्मक दोस्रो सेटमा ९–९ को बराबरीबाट अघि बढेको नेपालले लगातार ६ अंक जोड्दै जितको आधार तय गर्यो । त्यसपछि उज्वेकिस्तानले थप ७ अंक जोड्दा नेपालले खेल आफ्नो पक्षमा पार्न सफल भयो ।

तेस्रो सेटमा पनि नेपालले सोही लयलाई निरन्तरता कायम राख्दै २५–१५ को सहज जित निकाल्न सफल भयो । सुरुवातदेखि नै अग्रता लिएको नेपालले ७–४ को स्थितिबाट आरामदायी अग्रता लिदै १७–९ ले अघि बढ्यो । त्यसपछि अन्त्यतिर २४–१२ को स्थिति रहँदा नेपालले लगातार ३ अंक गुमाएपनि नेपालले थप १ अंक बटुल्दै जित निकाल्यो ।

चौथो सेटमा पनि सुरुवातदेखि नै अग्रता कायम राख्दै २५–१३ को जित निकाल्दै तेस्रो स्थान हासिल गर्न सफल भयो । यि दुई टोलीले दोस्रो संस्करणमा फाइन्ल खेल्दा नेपाल ३–२ को सेटमा विजयी हुँदै लगातार दोस्रो सिजन च्याम्पियन बन्न सफल भएको थियो ।

आज नै उपाधिका लागि भारत र काजकस्तानबीच खेल हुनेछ । यो खेल अपरान्ह ४ बजेपछि हुनेछ । दुवै टोली पहिलोपटक च्याम्पियन बन्ने लक्ष्यमा हुनेछ । यसअघिको दुवै संस्करणमा दुवै टोली सहभागी थिएनन् । दुवै बलियो टोली सहभागी नहुँदा नेपाल दुवै संस्करणमा च्याम्पियन बन्न सफल भएको थियो ।

भारतमा अनुभवी खेलाडीको बाहुल्यता रहँदा युवा खेलाडीले भरिएको काजकस्तान भारतलाई बलियो चुनौती पेश गर्दै उपाधि जित्ने लक्ष्यमा हुनेछ । काजकस्तानको यो सिनियर टोली होइन ।

नेपालमा आएको काजकस्तानको टोली त्यहाँ लिग खेलिरहेको टोली रहेको प्रशिक्षकले बताएका छन् । च्यालेन्ज कपमा श्रीलंका पाँचौ, किर्गिस्तान छैटौं, माल्दिभ्स सातौं र बंगलादेश आठौं भएको छ ।