काठमाडौं (हाम्रो खेलकुद)– गण्डकीमा गत वर्ष भएको नवौं राष्ट्रिय खेलकुद आयोजनामा झण्डै ५४ करोड रुपैयाँ खर्च भएको राष्ट्रिय खेलकुद परिषद् (राखेप) ले मंगलबार सार्वजनिक गरेको छ ।

गण्डकी प्रदेशमा नवौं राष्ट्रिय खेलकुद सम्पन्न भएको १० महिना भन्दा लामो समयपछि हिसाब सार्वजनिक गर्दै राखेप सदस्य सचिव टंकलाल घिसिङले ५३ करोड ७९ लाख ४ हजार २ सय ३९ रुपैयाँ ८ पैसा खर्च भएको बताएका छन् ।

त्रिपुरेश्वस्थित राखेपमा आयोजित पत्रकार सम्मेलनमा सदस्य सचिव घिसिङले सरकारबाट ६० करोड १० लाख रुपैयाँ प्राप्त भएको र आन्तरिक रुपमा ५१ लाख ५२ हजार ७ सय रुपैयाँ आम्दानी भएको जानकारी दिए । कुल ६० करोड ६१ लाख ५२ हजार ७ सय मध्ये ६ करोड ८२ लाख ४८ हजार ४ सय ६० रुपैयाँ ९२ बाँकी रहेको बताएका छन् ।

गण्डकीको कास्कीलगायत ८ जिल्लामा सन्चालन भएको नवौं राष्ट्रिय खेलकुदको असोज २८ मा भएको उद्घाटन र कात्तिक ३ गते भएको समापनमा मात्र २ करोड ७० लाख १८ हजार १ सय ८३ रुपैयाँ खर्च भएको बताइएको छ । प्रचार प्रसारका लागि १ करोड २४ लाख ५१ हहजार ५ सय १७ रुपैयाँ खर्च भएको राखेपले उपलब्ध गराएको खर्च विवरणमा उल्लेख छ ।

एनआरएनए टिम, निर्णायक, संघ प्रतिनिधि, खेलाडी, प्रशिक्षक र व्यवस्थापकको खाना तथा बसोबासमा मात्र १३ करोड १७ लाख ७६ हजार ९ सय ७० रुपैयाँ भएको बताएको छ । खेल सामाग्रीमा २ करोड खर्च भएको र भिभिआइपी भिआइपी पदाधिकारी तथा कर्मचारी दैनिक तथा भ्रमण भत्ता र खानाखाजमा १ करोड २८ लाख ४८ हजार ८० रुपैयाँ खर्च भएको बताइएको छ ।

किट्स ब्याग, निर्णायक जर्सी र खेल पोशाकका लागि १५ करोड ३९ ल्ँख ८५ हजार ८ सय २१ रुपैयाँ खर्च भएको विवरणमा उल्लेख छ । खेल स्थल निर्माण तथा खेल सन्चालन प्राविधि सामाग्री र खेल सामाग्री ढुवानीका लागि १ करोड २२ लाख ७४ हजार २ सय ३५ रुपैयाँ खर्च भएको बताइएको छ । राखेपले २१ वटा शीर्षकमा खर्च भएको उल्लेख गरेको छ ।

७ प्रदेश, ३ विभाग (सेना, प्रहरी र शसस्त्र प्रहरी ) र एनआरएनए गरि ११ टोलीको सहभागिता रहेको नवौं राष्ट्रिय खेलकुदमा २ हजार ७ सय १३ महिला तथा ३ हजार ४ सय १४ जना पुरुष खेलाडी गरि कुल ६ हजार १ एक २७ खेलाडीले प्रतिस्पर्धा गरेको थिए । ३ सय ९७ स्वर्ण, ३ सय ९७ रजत र ५ सय ५३ कास्य पदकसहित कुल १ हजार ३ सय ४७ पदकका लागि भएको प्रतिस्पर्धामा त्रिभुवन आर्मी क्लब शीर्ष स्थानमा रहेको थियो ।

नवौं राष्ट्रिय खेलकुदका लागि राष्ट्रिय बाणिज्य बैंकबाट ३० लाख, नेपाल टेलिकमबाट ५ लाख, राष्ट्रिय बीमा संस्थानबाट २ लाख प्रायोजन वापत र टिकट विक्रीबाट १४ लाख ५२ हजार ७ सय रुपैयाँ आम्दानी भएको जानकारी दिइयो ।

विभिन्न क्षेत्रमा भएका खर्चहरुलाई एकिकृत गरि खर्चको सम्पूर्ण विवरण तयार गर्न सबै क्षेत्रको भुक्तानी भई सक्नु पर्ने भएको उल्लेख गर्दै राखेपले ठूला चाडपर्वका समयमा प्रतियोगिता भएको र लगत्तै आमनिर्वाचन २०७९ मा राखेप कर्मचारीहरु खटिएकोले खर्चको हिसाब एकिन गर्न समय लागेको बताएको छ ।

भुक्तानीका प्रक्रिया अघि बढाउदै गर्दा नेपाल सरकारले देशको अर्थ व्यवस्थामा आएको चापलाई ध्यान दिई खर्च कटौतीका लागि सबै क्षेत्रको बजेट रोक्का गर्दा नवौं राष्ट्रिय खेलकुदको बजेट पनि रोकिन गए पछि भुक्तानी प्रक्रिया पूर्णरुपमा प्रभावित भएको राखेपको भनाई थियो । बजेट शिर्षकहरु फुकुवा गरी दिएकोले भुक्तानी गर्ने कार्य गरिएको थियो जसका कारण स्वर्ण पदक प्राप्त खेलाडीहरुको पुरस्कार रकम समेत ढिला भुक्तानी गर्नुपर्ने अवस्था आएको थियो ।

रकमान्तरको प्रक्रिया पूरा हुन २०८० साल आषाढ पहिलो हप्तासम्म लागेको र तत्पश्चात् भुक्तानी हुँदा खर्चको एकिन विवरण तयार गरी सार्वजनिक गर्न समय लागेको राखेप सदस्य सचिव घिसिङले बताएका छन् ।