काठमाडौं (हाम्रो खेलकुद) – गण्डकी प्रदेश भलिबल संघ काठमाडौंमा जारी वीरजङ स्मृति खुल्ला पुरुष राष्ट्रिय भलिबल प्रतियोगिताको फाइनलमा प्रवेश गरेको छ ।

नयाँ बसपार्कस्थित ढोरपाटन भलिबल प्रशिक्षण केन्द्रमा आइतबार भएको खेलमा विभागीय नेपाल एपिएफ क्लबलाई ३–१ को सेटमा पराजित गर्दै गण्डकीले फाइनलको यात्रा तय गरेको हो ।

पहिलो सेट २७–२९ ले गुमाएको गण्डकीले त्यसपछिको तीनै सेट आफ्नो पक्षमा पार्दै फाइनलमा प्रवेश गर्न सफल भयो ।रोमाञ्चक र प्रतिस्पर्धात्मक बनेको खेलमा एपिएफले लगातार ३ अंक जोड्दै पहिलो सेट आफ्नो पक्षमा पार्न सफल भयो ।

पहिलो सेट गुमाएको गण्डकीले दोस्रो सेट २५–२३ ले जित्दै खेललाई १–१ सेटको बराबरीमा ल्याए । तेस्रो सेट पनि २५–१४ ले सहजै आफ्नो पक्षमा पार्दै गण्डकी जिततर्फ अग्रसर बन्यो ।

विवादित बनेको चौथो सेट झन्डै ४० मिनेटपछि सुरु हुँदा गण्डकीले २६–२४ को जित निकाल्न सफल भयो । ९–९ को बराबरीको अवस्थामा गण्डकीका रवि केसीको प्रहार कोर्ट भित्र नै रहेको भन्दै रेफ्रीको निर्णयमा असन्तुष्टि जनाउँदै एपिएफका प्रशिक्षक महेश चौधरीले आफ्नो खेलाडीलाई कोर्ट बाहिर बोलाएका थिए । त्यसपछि रेफ्री र आयोजक कमिटिसँगै भिडियोको सहायतामा एपिएफ खेल्न राजी बनेको थियो ।

अब गण्डकीले उपाधिका लागि सोमबार नेपाल पुलिस क्लब र धौलागिरी रेष्टुरेन्ट ओसाका जापानबीचको विजेतासँग खेल्नेछ । यि दुई टोलीबीचको दोस्रो सेमिफाइनल केहीबेरमा हुँदैछ ।

नेपाल गणतान्त्रिक खेलकुद महासंघको आयोजनामा १८ असोजदेखि सुरु भएको प्रतियोगितामा ९ टोलीको सहभागिता रहेको छ। प्रतियोगिताको विजेताले ५ लाख रुपैयाँ, ट्रफी, मेडल र प्रमाणपत्र प्राप्त गर्नेछ । दोस्रो हुनेले २ लाख ५० हजार, तेस्रोले १ लाख र चौथो हुनेले ५० हजार रुपैयाँ प्राप्त गर्नेछ ।

सर्वाेत्कृष्ट खेलाडीले २० हजार रुपैयाँ प्रदान गरिने आयोजकले जनाएको छ । व्यक्तिगत विधातर्फ स्पाइकर, ब्लकर, सेटर, सर्भर, डिफेन्डर र क्विकरले समान ५ हजार रुपैयाँ प्रदान गरिनेछ । प्रतियोगिताको अनुमानित लागत २५ लाख रुपैयाँ रहेको छ ।