एजेन्सी – युरोपेली च्याम्पियनसिप (युरो) २०२४ को छनोटका खेल हरुमा गएराति स्पेन, वेल्स र टर्की विजयी भएका छन् ।

समुह ए अन्तर्गतको खेलमा स्पेनले नर्वेलाई १-० ले पराजित गरेको हो। खेलको एकमात्र गोल गाभीले ४९औं मिनेटमा गरेका थिए।

जित सँगै स्पेन युरोको लागि छनोट भएको छ। सोही समूह बाट स्कटल्याण्ड पनि युरोका लागि छनोट भएको हो। नर्वेले भने नेसन्स लिग प्लेअफ कुर्नु पर्ने भएको छ।

यस्तै समुह डी अन्तर्गतका खेलमा वेल्सले क्रोएसिया लागि २-१ ले हराउँदा टर्कीले लात्भियालाई ४-० ले पराजित गर्यो। वेल्सले आफ्नो प्रत्यक्ष छनोट प्रतिद्वन्द्वी क्रोएसियालाई पराजित गर्दै आफ्नो छनोटको आशा जीवित राखेको छ।

वेल्सका लागि फूलहमका खेलाडी ह्यारी विल्सनले दुबै गोल गरे। उता पराजित क्रोएसियाका लागि भने मारियो पासालिचले एक गोल गरे। टर्कीको जितमा भने चेन्क टोसुनले ३ गोल गर्दा युनुस आकगुन र केरेम आक्तुरकोग्लुले समान १ गोल गरेका हुन्।

समूहमा पहिलो स्थानमा रहेको टर्कीको १६ अंक रहँदा वेल्स र क्रोएसिया समान १० अंक सहित क्रमसः दोस्रो र तेस्रो छन्।

समूह इ मा भने पोल्याण्ड र मोल्डोभाले १-१ को बराबरी खेलेका छन्। यस समूहमा अल्बेनिया छ खेलमा १३ अंक सहित शीर्ष स्थानमा रहँदा समान छ खेल खेलेको चेकिया ११ अंक सहित दोस्रो स्थानमा छ। एक खेल बढी खेलेको पोल्याण्डको १० अंक छ।

यस्तै समूह आई को खेलमा रोमानियाले एन्डोरालाई ४-० ले पराजित गर्दा समूहको इजरायल र कोसोभोको खेल जारी इजरायल र प्यालेस्टाइनको युद्धका कारण हुन सकेन।

यस समूहमा आठ खेल खेलेको रोमानिया १६ अंक सहित शीर्ष स्थानमा छ। स्विट्जरल्याण्डको सात खेलमा १५ अंक रहँदा छ खेल खेलेको इजरायलको ११ अंक छ।