पोखरा (हाम्रो खेलकुद)– पोखरामा अर्को महिना ११ औं संस्करणको अन्तराष्ट्रिय सफल पोखरा म्याराथन आयोजना हुने भएको छ । भूतपूर्व खेलाडी मञ्च नेपालले फागुन ७ गते आयोजना गर्ने म्याराथनलाई सुजल डेरीको उत्पादन सफल दुधले मुख्य प्रायोजन गर्ने शुक्रबार यहाँ आयोजित पत्रकार सम्मेलनमा जानकारी दिइयो ।
मंचका अध्यक्ष खड्कबहादुर रानाभाटले म्याराथनमा झन्डै ५ हजार धावकलाई सहभागि गराउने दाबी गरे । ‘यस बर्ष म्याराथन एक सय ५० बढी धावक हुनेछन्,’ रानाभाटले भने,‘सिटी म्याराथनको अवधारणलाई उजागर गर्न व्यक्तिको स्वास्थ्यको लागि खेलकुद आवश्यक भएकोले पोखराका विभिन्न बिद्यालयका बिद्यार्थी एवं खेलकुदकर्मी सहित गरी ५ हजार जनालाई रन फर रनमा सहभागी गराउने लक्ष्य राखेका छौं ।’
पोखरा म्याराथनमा फुल म्यराथान(४२.१९५ किमी),छात्रा/छात्र तर्फ ५ किमी, अपाङ्गता भएकाहरुको लागि व्हिल चियर महिला/पुरुष ४ सय मिटर का इभेन्ट आयोजना गरिने रानाभाटले बताए । म्याराथनका विजेताले ६० हजार, उपविजेताले ४० हजार, तेश्रोले २५ हजार र चौथो हुनेले ४ हजार रुपैयाँका साथै ट्रफी मेडल प्राप्त गर्ने मञ्चका उपाध्यक्ष तेज गुरुङले बताए ।
छात्रा/छात्र तर्फ ५ किमी जित्नले ७ हजार, दोस्रा हुनेले ५ र तेस्रा हुनेले ३ हजार पाउनेछन् । व्हिल चियर महिला/पुरुष तर्फ विजयी हुनेले ३ हजार, दोश्रो हुनेले २ हजार र तेश्रो हुनेले १ हजार रुपैयाँ पाउनेछन् । लक्ष्मी हाउसको भातृ संस्था सुजल डेरीको उत्पादन सफल दुधले गत बर्ष देखि म्याराथनलाई प्रायोजन गरेको हो । ३ बर्षे सम्झौता अर्को बर्षसम्म रहनेछ । सम्झौता सकिए पछि त्यसलाई निरन्तरता दिन सकिने लक्ष्मी हाउसका कार्यकारी निर्देशक सुनिल श्रेष्ठले बताए ।
म्याराथनका लागि झन्डै १७ लाख रुपैयाँ खर्च हुने मञ्चको अनुमान छ । शान्ति र स्वास्थ्यका लागि खेलकुद भन्ने भावनाको विकास गराउने , खेलाडीको प्रतिभा प्रष्फुटन गराउने, बन्धुत्वको विकास गराउने, पोखराको पर्यटकीय प्रवद्र्धनमा टेवा दिने, सुन्दर पोखरा शहरलाई विश्व सामु चिनाउने लक्ष्यका साथ म्याराथन आयोजना गर्न लागिएको मञ्चले जनाएको छ ।
पत्रकार सम्मेलनमा पश्चिमाञ्चल क्षेत्रिय खेलकुद विकास समितिका अध्यक्ष खगराज पौडेल, अमेरीकन समुह एएनएका अध्यक्ष मेदीनी अधिकारी, सहारा युकेका अध्यक्ष मीन गुरुङ लगायतले पोखराको ब्राण्ड बनाउने अभियानलाई मद्दत पुर्याउनेका लागि पोखरा म्याराथनलाई निरन्तरता दिनु पर्नेमा जोड दिए ।
