एजेन्सी – भारतको आइसिसी विश्वकप उपाधि जित्ने सपना पुन अधुरै रह्यो । घरेलु मैदानमा सानदार प्रदर्शन गरेपनी फाइनलमा अष्ट्रेलियासँग ६ विकेटले हार्न पुग्यो ।

जितको लागि २ सय ४१ रनको प्रतिस्पर्धात्मक लक्ष्य पछ्याएको अष्ट्रेलियाले ४३ ओभरमा ४ विकेट गुमाउँदै पूरा गर्यो ।

अष्ट्रेलियाका ट्रविस हेडले १ सय २० बलमा १५ चौका र ४ छक्कासहित १ सय ३७ रनको सानदार शतकीय इनिङ खेले । मार्नस लाबुसेन ११० बलमा ४ चौकासहित ५८ रनमा अविजित रहे ।

त्यसअघि नरेन्द्र मोदि स्टेडियम अहमदाबादमा टस हारेर पहिला ब्याटिङको निम्तो पाएको भारत निर्धारित ५० ओभरमा २ सय ४० रनमा अल आउट भएको थियो ।

घरेलु मैदान, लाखौं दर्शक, उत्कृष्ट लय, विश्वकपमा सर्वाधिक रन र विकेट लिने आफ्नो खेलाडी रहेपनी फाइनल जित्न सकेन । भारतले हार्नुका प्रमुख पाँच कारण यस प्रकार छन् ।

५. हेड र लाबुसेनको साझेदारी तोड्न नसक्नु

भारतलाई खेल जित्न अष्ट्रेलियालाई अल आउट गर्नु पर्ने हुन्थ्यो । भारतले सुरुवातमै वार्नर ७, मिचेल मार्श १५ र स्टिभ स्मिथलाई ४ रनमा आउट गरेपछि ७ ओभरमा ४७-३ को अवस्थामा पुर्याएको थियो ।

यो अवस्थामा थप दुई विकेट लिएको भए भारत जित्न सक्थ्यो । किनभने यी दुई जोडीपछी ब्याटरको रुपमा म्याक्सवेल र जोश इंग्लिस थिए । त्यसपछि बलर आउथे ।
तर लाबुसेन र हेडले १ सय ९२ रनको सानदार शतकिय साझेदारी गर्दै सहज जित दिलाए । स्कोर बोर्डमा धेरै रन नहुदा एउटा सानो साझेदारी भारतलाई भारी पर्ने पक्का थियो । यी दुइ साझेदारी तोड्न नसक्नु हारको एक कारण हो ।

४. रोहित उत्कृष्ट क्याचको सिकार हुनु

भारतलाई ओपनर रोहित शर्माले सानदार सुरुवात दिलाएका थिए । रोहितले ठुलो योगफलको सम्भावना देखाएका थिए । तर स्पिनर ग्लेन म्याक्सवेलको दशौं ओभरको चौथो बलमा ठुलो शर्ट खेल्ने धुनमा कभरमा रोहित ४७ रनमा क्याच आउट भए ।

हेडले लामो दौडका साथ ड्राइभ हान्दै उत्कृष्ट क्याच लिए । त्यो नै खेलको प्रमुख टनिङ प्वाइन्ट थियो । रोहितले ३१ बलमा ४ चौका र ३ छक्का हाने । रोहितपछी कुनै पनि ब्याटरले खुलेर रन बनाउन सकेनन् । अर्को बाउन्ड्री प्रहार गर्न ९७ बल पर्खिनु परेको थियो ।

३. स्कोर बोर्डमा रन कम हुनु

भारतको हारमा बलरलाई दोष दिने ठाउँ छैन । किनभने भारतले बनाएको रन जितको लागि पर्याप्त थिएन । ओडिआईमा २ सय ४० रन मध्यम योगफल मानिन्छ । भारतले विशाल योगफल बनाउन कुनै एक ब्याटरले ठुलो इनिङ खेल्नु पर्ने थियो ।

यस अघि भारतका शिर्षक्रमका ब्याटरले ठूलो इनिङ खेल्दै आएका थिए । तर फाइनला शिर्षक्रम चलेन । मध्यक्रम र तल्लोक्रमका ब्याटरले राम्रो गर्न सकेनन् ।

अष्ट्रेलिया च्याम्पियन टोली हो । उस्लाई दबाबमा राख्न स्कोर्ड बोर्डमा रन पर्याप्त थिएन । सुरुवातमा विकेट गुमाएपनी नेटरनरेटको दबाब कुनैपनी समय रहेन । त्यसैको कारण हार्यो ।

२. बाउन्ड्रीको जोखिम नलिनु

रोहित शर्मा बाहेक कुनैपनी ब्याटरले बाउन्ड्रीको जोखिम लिन सकेनन् । लोकेश राहुलले १ सय ७ बल खेलेपनि १ चौका मात्रै हानेका थिए । विराटले ६३ बलमा ४ चौका हानेका थिए । सुर्य कुमार यादवले १८  बलमा १ चौका हानेका थिए ।

भारतले दशौं ओभरको  अन्तिम बलमा चौका हानेपछि अर्को बाउन्ड्री हान्न ९८ बल पर्खिनु परेको थियो । रोहितले ३१ बलमा ४ चौका र ३ छक्का हाने । रोहित बाहेक कुनैपनि ब्याटरले छक्का हान्न सकेनन् ।

भारतीय ब्याटरले पुरै  ५० ओभर खेल्दा खेलमा कुल १३ चौका ३ छक्का हानेका थिए । उता अष्ट्रेलिया ट्रविस हेडले एक्लै १५ चौका र ४ छक्का हानेका थिए ।

पार्टटाइम स्पिनर हेड र तिव्र गतिका बलर मिचेल मार्शको बलमा समेत रन जोड्न डराएको थियो । बाउन्ड्रीले बलरलाई र डट बलले ब्याटरलाई दबाब बढाउछ । तर चौका र छक्का प्रहार गर्न भारतीय ब्याटर डराएका थिए । त्यसैको कारण विशाल योगफल बनाउन सकेन । मौका आएको बलमा पनि जोखिम नलिनु हारको कारण थियो ।

१. दबाबमा खेल्न नसक्नु र प्याट कमिन्सको उत्कृष्ट कप्तानी

भारतको सबैभन्दा ठूलो कमजोरी नै दबाबमा खेल्न नसक्नु हो । भारतले प्रतियोगिताभर सानदार क्रिकेट खेलेको थियो । तर फाइनल अन्य खेल जस्तो हुँदैन । दबाब नै बढि हुन्छ । उक्त दबाबमा भारतले राम्रो गर्न सक्दैन । त्यही गल्तिको कारण पुन हार्यो ।

भारतले सुरुवात पनि विस्फोटक गरेको थियो । सुरुवाती १० ओभरमा २ विकेट गुमाउदै ८० रन बनाएको थियो। प्याट कमिन्सको ११ औं ओभरको दोस्रो ओभरमा श्रेयस ऎर एज लागेर विकेटकिपरबाट क्याच आउट भए ।

त्यसपछि भारतले कुनैपनी समय खेलमा हाबी हुन सकेन । लगातार विकेट बचाउने धुनमा गएको थियो । बाउन्ड्री प्रहार गर्न झन्डै  एक सय बल पर्खिनु परेको थियो ।

उता अष्ट्रेलियाले सुरुवातमा ४७-३ भएपनि कमजोर बललाई लगातार चौका र छक्का हानेको थियो। च्याम्पियन बन्न दबाबमा राम्रो खेल्नुपर्छ । जुन भारतले सकेको छैन । भारतमा कोहली, राहुल, रोहित र बुमराह जस्ता स्टार खेलाडी छन् । तर फाइनलमा यी सबैको प्रदर्शन सधैं अपेक्षा भन्दा खराब हुन्छ ।

अर्को तर्फ प्याट कमिन्सको उत्कृष्ट कप्तानी भारतको हारको प्रमुख कारण हो । कमिन्सले टस जितेर फिल्डिङ रोजेपछी धेरैले कमिन्सको आलोचना गरेका थिए । तर कमिन्सले किन टस जितेको प्रमाणित गरेर देखाए ।

बलिङ परिवर्तन र फिल्डिङ सजावट उत्कृष्ट थियो ।
अष्ट्रेलियाले सेमिफाइनल र फाइनलमा सानदार फिल्डिङ गरेको थियो । हरेक भारतीय ब्याटरको कमजोरी अनुसार बलिङ गर्दै फिल्डिङ लगाएका थिए । त्यसैको कारण भारतीय ब्याटर खुलेर खेल्न सकेनन् ।

अष्ट्रेलिया जितमा कमिन्सको कप्तानी पनि उत्कृष्ट रह्यो । प्रतियोगिता लिगमा आलोचना खेप्दै आएका उनले फाइनलमा भने कप्तानी र बलिङ दुबै राम्रो गरे ।