काठमाडौं (हाम्रो खेलकुद) – जलपरी गौरिका सिंह र पौडीवाज नासिर याहा हुसेनले विश्व एक्वाटिक्स च्याम्पियनसिपमा नयाँ राष्ट्रिय कीर्तिमान कायम गरेका छन् ।

कतारको दोहामा जारी विश्व एक्वाटिक्स च्याम्पियनसिप दौरान साेमबार गौरिकाले १०० मिटर ब्याकस्ट्रोकमा आफ्नै नाममा रहेको पुरानो किर्तिमान भंग गरेकी हुन् । नयाँ कीर्तिमान बनाउने क्रममा गौरिकाले निर्धारित दुरी १ मिनेट ५ दशमलव ४७ सेकेन्डमा पूरा गरिन् ।

यसअघि गौरिकाले सन् २०२३ मा जापानको फुकुवाकामा भएको विश्व एक्वाटिक्स च्याम्पियनसिपमा १ मिनेट ६ दशमलव ८० सेकेन्डको समयसहित कीर्तिमान बनाएका थिए ।

यस्तै नासिरले २०० मिटर फ्रिस्टायलमा अर्को किर्तिमान बनाएका हुन् । नासिरले पनि जापानको फुकुवामै भएको विश्व एक्वाटिक्स च्याम्पियनसिप २०२३ मा कायम गरेको १ मिनेट ५७ दशमलव २६ सेकेन्डको समयमा ० दशमलव ८७ सेकेन्ड समय सुधार गर्दै १ मिनेट ५६ दशमलव ३९ सेकेन्ड समयको नयाँ किर्तिमान कायम गरेको नेपाल पौडी संघका अध्यक्ष अशोक रत्न बज्राचार्यले जानकारी गराए ।

यसअघि नासिरले आइतबार भएको ४०० मिटर फ्रिस्टायलमा पनि ४ मिनेट ५ दशमलव ६५ सेकेन्डको नयाँ किर्तिमान कायम गरेका थिए ।