काठमाडमौं (हाम्रो खेलकुद) – प्रदिप खड्का र अभिलाषा विष्ट ‘१२औं सहवीर स्मृति खुल्ला लन टेनिस प्रतियोगिता–२०८० को च्याम्पियन बनेका छन् । प्रदिप पुरुष एकलमा तथा अभिलाषा महिला एकलमा च्याम्पियन बनेकी हुन् ।

सशस्त्र प्रहरी बल (एपिएफ) को प्रधान कार्यालय हल्चोक स्वयम्भुमा शुक्रबार भएकोे पुरुष एकलको फाइनलमा प्रदिपले रितिक रानालाई ६–४, ३–६ र ६–० ले तथा महिला एकलमा अभिलाषाले माहिका राणालाई ६–२ र ६–४ ले पराजित गरी उपाधि जित्न सफल भएका हुन् ।

त्यसैगरी मिक्स डबलमा रितिक राना र अभिलासा विष्टको जोडीले प्रदिप खड्का र माहिका राणाको जोडिलाई ६–४, २–६ र १०–६ ले पराजित गरी उपाधी जिते ।

यसैगरी ३५ वर्षमाथि भेन्ट्रान्स एकलतर्फ अनिल शाहीले भिष्मजंग गुरुङलाई ६–३ र ६–० ले र ३५ वर्षमाथि भेन्ट्रान्स डबलतर्फ ईलुम दिक्षित र जितेन्द्र परियारको जोडीले कमल भण्डारी र यज्ञबहादुर भण्डारीको जोडिलाई ४–६, ६–३ र १०–८ ले पराजित गरी उपाधि जिते ।

४५ वर्ष भेन्ट्रान्स एकलतर्फ रोहित सुनुवारले महेश श्रेष्ठलाई ६–२, ६–४ ले र ४५ वर्षमाथि भेन्ट्रान्स डबल्समा कमल बहादुर भण्डारी र उत्तम शेर्पाको जोडीले देगेन्द्र श्रेष्ठ र महेश श्रेष्ठको जोडिलाई ६–३ र ७–५ ले पराजित गरी उपाधि जितेका छन् ।

यसैगरी ५५ वर्षमाथि भेन्ट्रान्स एकलमा विमल वाईबाले राजु श्रेष्ठलाई २–६, ६–१ र १०–४ ले र ५५ वर्षमाथि भेन्ट्रान्स डबल्समा बिमल वाईबा र हिमाल शाहको जोडीले कमल थापा र छम्बा ढुण्डुपको जोडीलाई ६–३ र ६–४ ले पराजित गरी उपाधि जितेका छन् ।

६५ वर्षमाथि भेन्ट्रान्स एकलमा कमल थापाले मनोज राणालाई ४–१ र ४–२ ले र इन्टर गभरमेन्ट डबलतर्फ उत्तम बोगटी र अमित गुरुङको जोडीले बिक्रम गुरुङ र चन्द्र बहादुर थापाको जोडीलाई ६–२, २–६ र १०–७ ले पराजित गरी उपाधि जितेका छन् ।

विजयी टोली तथा खेलाडीलाई सशस्त्र प्रहरी महानिरीक्षक राजु अर्यालले शिल्ड, प्रमाण–पत्र तथा नगद पुरस्कार प्रदान गरे । महानिरीक्षक अर्यालले प्रतियोगिता संचालनमा सहयोग पु¥याउने विभिन्न संघ संस्था, रेफ्री तथा अफिसियलहरुलाई समेत प्रशंसा पत्र तथा मायाको चिनो प्रदान गरे ।

महानिरीक्षक अर्यालले संगठनले आफ्नो स्थापना कालदेखि नै बिभिन्न खेलकुद गतिविधिहरु निरन्तर रुपमा संचालन गर्दै आईरहेको बताउनुहुँदै प्रतियोगिता सफल रुपमा सम्पन्न गर्न सहयोग पु¥याउने विभिन्न खेलकुद संघ संस्था, प्रशिक्षक, अफिसियल तथा महानुभावहरुप्रति आभार प्रकट गरे ।

४ चैतबाट शुरु भएको ११ वटा इभेन्ट्समा कुल १ सय ६२ जना सहभागी रहेको प्रतियोगिताका खेलहरु नेपाल एपीएफ क्लबको लन टेनिस कोर्ट हल्चोक र दशरथ रंगशालास्थित लनटेनिस कोर्टमा संचालन भएका थिए ।

कार्यक्रममा सशस्त्र प्रहरी अतिरिक्त महानिरीक्षकद्वय चन्द्रप्रकाश गौतम र बंशीराज दाहाल, नेपाल टेनिस संघकी अध्यक्ष ज्योती राणा लगायत बहालवाला तथा अवकाश प्राप्त सशस्त्र प्रहरी अधिकृतहरुको समेत उपस्थिति रहेको थियो ।