सिड्नी (हाम्रो खेलकुद) – अस्ट्रेलियाको सिड्नीमा अर्काे साता दोस्रो गल्कोट कप भलिबल प्रतियोगिता आयोजना हुने भएको छ ।

अस्ट्रेलियामा रहेका बागलुङस्थित गल्कोटबासीको सक्रियतामा स्थापना भएको गल्कोट समाज अस्ट्रेलिया (जिएसए) को आयोजनामा अर्काे साता अर्थात मार्च ३१ तारिखमा एकदिने पुरुष भलिबल प्रतियोगिता आयोजना हुन लागेको हो ।

एक दिने प्रतियोगिता सिड्नीको ओवर्नस्थित ओवर्न बास्केटबल सेन्टरमा हुनेछ । प्रतियोगितामा अस्ट्रेलियाका रहेका नेपाली समुदायका विभिन्न १२ टोलीको सहभागिता रहेको छ ।

आइतबार प्रतियोगितामा सहभागिता जनाउने १२ टोलीको टुंगो र खेल तालिका सार्वजनिक गरिएको छ । १२ टोलीलाई दुई समूहमा विभाजन गरिएको छ ।

समूह ‘ए’ मा थकाली सेवा समिति, जलजला परिवार, पर्वत बेनी, मोना अस्ट्रेलिया, आयोजक गल्कोट समाज अस्ट्रेलिया र ढोरपाटन स्पोर्ट्स क्लब रहेका छन् ।

समूह ‘बी’ मा छन्त्याल परिवार अस्ट्रेलिया, गोल्डेन ब्वइज, म्याग्दी काली, दि गोर्खा स्पोर्ट्स क्लब ‘ए’ र ‘बी’ सँगै पोखरा भलिबल क्लब रहेका छन् ।

प्रतियोगिताको विजेता टोलीले २ हजार ५ सय अस्ट्रेलियन डलरका साथमा ट्रफी, मेडल र प्रमाणपत्र प्राप्त गर्नेछन् । उपविजेताले १ हजार ५ सय डलरसँगै ट्रफी, मेडल र प्रमाणपत्र हात पार्नेछन् । सर्वाेत्कृष्ट खेलाडीले १ सय अस्ट्रेलियन डलर तथा व्यक्तिगत विधाका उत्कृष्टहरुले ५० अस्ट्रेलियन डलर पाउनेछन् ।

प्रतियोगितालाई नमस्ते ज्वेलर्सले मुख्य प्रायोजन गरेको छ । बिएनबी होम लोन, एएलडी कर्पाेरेट, वल्ड दरवार, हाम्रो रेमिट, दा भिन्ची टुर्स एण्ड ट्राभल्स, ग्लोबल कन्सल्ट एजुकेसन एण्ड भिजा, लालटिन कजिन, युनिक होम्स, डिबि सर्भिस ग्रुप र एभरेस्ट तन्दुरीले पनि सहयोग गरेको छ ।

पछिल्लो समय सिड्नीमा रहेका नेपाली समुदायबीच नेपालको राष्ट्रिय खेल भलिबलको निकै लोकप्रियता बढ्दै गइरहेको छ । विभिन्न क्लबहरुले प्रतियोगिताहरु आयोजना गर्दै गइरहेको छ ।