पोखरा (हाम्रो खेलकुद)- लामाचौर कप भलिबल प्रतियोगिताको महिलातर्फ टिप टप न्यु डायमण्ड युथ स्पोटर्स क्लब र एपिएफ क्लबले‌ लगातार दोस्रो जित निकालेका छन् ।

पुरुषतर्फ नेपाल पुलिस क्लब विजयी भएको छ। पुरुषतर्फ गण्डकी प्रदेश र एपिएफको भने प्रकाश अभाव (लाइट प्रोटेस्ट) कारण स्थगित भएको छ ।

पोखरा १९ लामाचौरस्थित इन्द्रराज्य लक्ष्मी माविको भलिबल कोर्टमा बुधवार भएको महिलातर्फको खेलमा न्यु डायमण्डले गण्डकीलाई ३-० को सोझो सेटमा हरायो । पहिलो सेटमा २५-१३ ले हराएको डायमण्डले दोस्रो सेट २५-१६ र तेस्रो सेट २५-१६ ले नै हराउँदै लगातार दोस्रो जित दर्ता गरेको हो ।

विहान ८ बजे सुरु हुनुपर्ने खेल वर्षाका कारण ढिला सुरु भएको थियो । न्यु डायमण्डले पहिलो खेलमा एभरेष्ट भलिबल क्लबलाई ३-० कै सोझो सेटमा हराएको थियो ।

अर्को खेलमा एपिएफले एभरेष्टलाई ३-० कै सोझो सेटमा हराएको छ । एपिएफले पहिलो सेट २५-१० र दोस्रो सेट २५-११ को फराकिलो अन्तरले पाखा लगायो । अन्तिम सेटमा पनि एभरेष्टलाई २५-१३ ले हराउँन सफल भएको हो ।

न्यु डायमण्ड र एपिएफको समान ६ अंक छ । एक अर्काको सामना गर्नुअघि दुई टोली फाइनल पुगेका छन् । लिग चरणमा यि दुई टोलीबीचको खेल बिहीवार हुनेछ।
गण्डकी र एभरेष्ट भने अंक विहिन छन् ।

४ टोलीको‌ सहभागिता रहेको महिला र पुरुष दुवैतर्फ अंक तालिकाको शीर्ष २ टोलीले फाइनल खेल्नेछन्।

पुरुषतर्फ पुलिसले ट्राभल इन्क्वाइरी गलकोटलाई ३-० को सोझो सेटमा हरायोयो । पुलिसले गलकोटलाई पहिलो सेटमा २५-१२, दोस्रो सेटमा २५-१७ र तेस्रो सेटमा २५-२२ ले हराएको हो । दुई खेलमा जित हासिल गरेको पुलिसको ६ अंक छ । पुलिसले यसअघि गण्डकी प्रदेशलाई ३-० को सोझो सेटमा हराएको थियो ।

दिनको अन्तिम खेलमा गण्डकी र एपिएफ प्रतिस्पार्धा गर्दैगर्दा दोस्रो सेट सकिदा लाइटप्रोटेस्टका कारण खेल रोकिएको छ । उक्त खेलमा दुवै टिमले १-१ सेट जितेका थिए ।

गण्डकीले पहिलो सेट २५-२२ ले आफ्नो पक्षमा पारेपनि दोस्रो सेट १९-२५ ले गुमाएको थियो । स्थगित एपिएफ र गण्डकीको खेलसहित लिगका बाँकी खेल बिहीवार हुने प्रतियोगिता संयोजक शंकर केसीले जानकारी दिए ।