धादिङ (हाम्रो खेलकुद) – धादिङकाे निलकण्ठ नगरपालिका वडा नं.१४ धुवाकोटमा चौथो खुल्ला सेभेन ए साइड नकआउट फुटबलसँगै खुल्ला मिनि म्याराथन दौड प्रतियोगिता हुने भएको छ ।

कुपा युवा समाजको आयोजनामा विजया दशमी तथा दीपावलीको अवसरमा असोज २३ गतेदेखि कात्तिक १ गतेसम्म फुटबल तथा खुल्ला १० किलोमिटर मिनि म्याराथन दौड प्रतियोगिता हुने क्लबका अध्यक्ष हर्क गुरुङले जानकारी दिए । मिनि म्याराथन कात्तिक १ गते कोजाग्रत पुर्णिमाको दिन हुनेछ ।

फुटबलको विजेताले ६६ हजार ६ सय ६६ रुपैयाँसहित ट्रफी, मेडल र प्रमाणपत्र, उपविजेताले ३३ हजार ३ सय ३३ रुपैयाँसहित ट्रफी,मेडल र प्रमाणपत्र पाउनेछ । सेमिफाईनलमा पराजित हुनेले १० हजार रुपैयाँ पाउने आयोजकले जनाएको छ ।

उत्कृष्ट खेलाडी, गाेलरक्षक, उच्च गोलकर्तालाई पनि पुरस्कारको व्यवस्था गरिएको छ । फुटबल प्रतियोगितामा सहभागीको लागि टिम दर्ता शुल्क ६ हजार तोकिएको छ ।

यसैगरी मिनि म्याराथन दौडमा पहिलाे हुनेलाई २२ हजार रुपैयाँसहित प्रमाण पत्र र मेडल तथा दाेस्राेले ११ हजार रुपैयाँसहित प्रमाण पत्र र मेडल प्रदान गरिने । उत्कृष्ट चारलाई विशेष पुरस्कार व्यवस्था गरिएको आयोजकले जनाएको छ ।

स्वास्थ्यका लागि खेलकुद,राष्ट्रको लागि खेलकुद भन्ने मूल नाराका साथ खेलकुद मार्फत सबै खेलप्रेमी साथै ग्रामिण भेगमा लुकेर बसेको प्रतिभाहरु लाई प्रस्फुटन गर्नको लागि प्रतियोगिता आयोजना गरिएको कार्यक्रम संयोजक अरुण गुरुङले जानकारी दिए ।