बहराइसँगको‌ हारपछि नेपालको समूह चरणबाट बाहिरियो

काठमाडौं (हाम्रो खेलकुद)- एएफसी यु-२० एसियन कप छनोटमा शुक्रवार नेपाल‌ बहराइनसँग ४-० को फराकिलो अन्तरमा पराजित भएको छ। तेस्रो हारमा नेपालको छनोटको यात्रा समाप्त भएको छ।

समुह चरणको अन्तिम खेलमा कमजोर नेपाल विरूद्ध बहराइन खेल अवधिभर नै हाबी रहयो। खेलको २८औं मिनेटमा सामी बासामको फ्रि-किक प्रहार सिधेै गोलमा परिणत भएपछि बहराइनले १-० को अग्रता बनायो।

यसपछि पहिलो हाफको इन्ज्युरी टाइममा खालिद अल्खलाफले बहराइनको अग्रता दोब्बर पारे। पहिलो हाफमा २-० ले पछि परेको नेपाल दोस्रो हाफमा पनि खेलमा फर्कन सकेन।

सामी बासामले ७३औं मिनेटमा व्यक्तिगत दोस्रो गोल गरे। यसपछि ८४औं मिनेटमा अलि अहमद हसनले अर्को एक गोल थपेसँगै बहराइनले नेपाल विरूद्ध ४-० को रवाफिलो जितमा छनोटको संभावनालाई कायमै राखेको छ।

बहराइनले आइतवार उज्वेकिस्तानको सामना गर्नेछ।
बहराइनले ३ खेलमा ६ अंक बनाएको छ। नेपालको यो तेस्रो हार हो। एक खेलमा मात्र जित निकालेको नेपाल ३ अंक सहित समूह चरणबाट बाहिरियो।