एजेन्सी – युवा ओपनर सइम अयुबको शतक सहयोगमा पाकिस्तानले दोस्रो ओडिआई खेलमा घरेलु टोली जिम्बाब्वेमाथि सहज जित हात पारेको छ ।

मंगलवार भएको खेलमा पाकिस्तानले जिम्बाब्वेमाथि १० विकेटको सहज जित हात पार्यो । जितका साथ ३ खेलको ओडिआई सिरिजमा पाकिस्तानले १-१ को बराबरी गरेको छ ।

जिम्बाब्वेले दिएको १ सय ४६ रनको सामान्य लक्ष्य पाकिस्तानले १८.२ ओभरमा कुनै विकेट नगुमाई पूरा गर्यो । पाकिस्तानका् जितमा ओपनर अयुबले नट आउट रहँदै सर्वाधिक १ सय १३ रन जोडे । उनले ६२ बलमा १७ चौका र ३ छक्का प्रहार गरेका थिए । अर्का ओपनर अब्दुल्लाह शफिकले ४८ बलमा ४ चौकाको सहयोगमा नट आउट ३२ रन जोडे । जिम्बाब्वेले ५ बलरको प्रयोग गरेपनि कुनै विकेट लिन सकेन ।

त्यसअघि बुलुवायोमा रहेको क्निस स्पोट्स क्लबमा टस जितेर ब्याटिङ गरेको जिम्बाब्वेले ३२.३ ओभरमा अल आउट हुदै १ सय ४५ रनको सामान्य योगफल तयार गरेको थियो ।

जिम्बाब्वेका लागि डियोन मेर्सले ३० बलमा सर्वाधिक ३३, सेन विलियम्सले ३९ बलमा ३१, सिकन्दर राजाले १७ बलमा १७ रन जोडेका थिए । पाकिस्तानका लागि अब्रार अहमदले ४, सलमान आगाले ३ तथा सइम अयुब र फैसल अक्ररमले समान १ विकेट लिएका थिए ।

पहिलो ओडिआईमा आइतवार जिम्बाब्वे डकवर्थ लुईस मेथडमा ८० रनले विजयी भएको थियो । दुई देशबीचको तेस्रो ओडिआई बिहीवार रहेको छ ।