काठमाडौं (हाम्रो खेलकुद)- एनसेल एनएसएलमा झापा एफसी र बुटवल लुम्बिनीबीचको खेल जारी छ। पहिलो हाफ गोल रहित बराबरीमा सकिएको छ।

पहिलो हाफमा झापाले एकपक्षीय दबाब बनाए पनि बुटवलका गोल रक्षक दीप कार्कीको प्रभावशाली प्रदर्शनमा‌ झापाले गोल गर्न सकेन। दीप अक्सनमा अन सोल्ड हुँदा विस लिस्टबाट बुटवलले भित्राएको थियो।

दशरथ रंगशालामा जारी खेलको पहिलो हाफमा झापाले पूर्ण रुपमा पकड बनायो। गोल गर्ने उत्कृष्ट मुभहरु बुन्यो। तर‌ करिब आधा दर्जन मौकालाई सदुपयोग गर्न सकेन। आठौं मिनेटमा अल्हाजी जेरोले बक्सभित्रबाट हानेको पावरफुल सटलाई बुटवलका गोल रक्षक दीप कार्कीले बचाए।

१३ औं मिनेटमा फेरि दीप नै बाधक बने। इसाएभ मुखाम्मदले बक्सको एजबाट हानेको आकर्षक प्रहारलाई दीपले सानदार शैलीमा रोके।

२२ औं मिनेटमा पनि झापा चुक्यो। आर्सिक लाजरको प्रहारलाई फेरि दीपले बचाए। यही बलबाट पाएको कर्नरमा अजामद अब्दुलेभको उत्कृष्ट हेडरलाई दीपले पन्च गरेर बचाए। ३७ औं मिनेटमा रितीक खड्काको कडा प्रहार थोरैले पोष्ट माथीबाट बाहिरियो।

बुटवलले भने ३८ औं मिनेटमा पहिलो पटक गतिलो पोष्ट चार्ज गर्यो। फिलिपा अड्जाहले बक्सको एजबाट हानेको राइट फुटेट सटलाई झापाका गोल रक्षक नेमान्जा लेमाजिकले बचाए। जारी लिगमा ७ टोलीको सहभागिता रहेको छ।