हिमाल खरेल,भद्रपुर

आयोजक चन्द्रगढी भेट्रान क्लब गम्भीर राई स्मृति पाँचौँ चन्द्रगढी भेट्रान नकआउट फुटबल प्रतियोगिताको फाइनलमा प्रवेश गरेको छ ।

भद्रपुरको मेची रंगशालामा आज भएको पहिलो सेमिफाइनल खेलमा दुधे भेट्रान क्लबमाथि ३-० को जित निकाल्दै आयोजक उपाधि नजिक पुगेको हो।

चन्द्रगढीका लागि सुवास खड्काले खेलको २३ औँ र ४७ औँ मिनेटमा गोल गरे‌। सन्तोष बस्नेतले ४१ औं मिनेटमा गोल गरे । चन्द्रगढीका सन्तोष बस्नेत प्लेयर अफ दि म्याच भए र उनले २ हजार १ सय रुपैयाँ पाए ।

भोलि अन्तिम सेमिफाइनल खेल बिर्तामोडको पूर्वेली युवा क्लब र उर्लाबारीको ढल्के जोवन भेट्रान एफसीबीच हुनेछ ।

राष्ट्रिय टोलीका पूर्वसदस्य गम्भीर राईको स्मृतिमा भएको प्रतियोगितामा झापा ११ र मोरङको एक गरी १२ टिमको सहभागिता रहेको आयोजक चन्द्रगढी भेट्रान क्लबका अध्यक्ष गजेन राईले जानकारी दिए ।

बैशाख १३ गते हुने फाइनल खेलको विजेताले १ लाख १ हजार र दोस्रो टोलीले ५१ हजार, ट्रफी, मेडल र प्राप्त गर्ने क्लबका उपाध्यक्ष बिक्की जैसवालले जानकारी दिए त्यस्तै, प्रतियोगिताका विधागत उत्कृष्ट खेलाडीले समान ३ हजार १ सयसहित ट्रफी प्राप्त गर्नेछन् ।

भद्रपुर नगरपालिका सहयोगी रहेको प्रतियोगिताको मुख्य प्रायोजक ओमकार हार्डवयेर तथा ओमकार रेडीमिक्स भद्रपुर रहेको छ । प्रथम पुरस्कार टार्जन गुरुङ र चन्द्रगढी–भद्रपुर वैदेशिक रोजगार समूहले उपलब्ध गराएको हो ।