काठमाडौं (हाम्रो खेलकुद) – अस्ट्रेलियामा रहेका करातेका पूर्व खेलाडीको समूहले एभरेस्ट मार्सल आर्ट्स एकेडेमी सञ्चालमा ल्याएका छन् ।

अस्ट्रेलियाको सिड्नीस्थित ग्रानभिलमा कार्यालय राखिएको एकेडेमीमा अहिले ९ सदस्यीय कार्यसमिति बनेको छ ।

एकेडेमीको अध्यक्षमा मुकुन्द्र महर्जन छन् । उनी दक्षिण एसियाली खेलकुद (साग) का कांस्यपदक, पाँचौं, छैटौं र सातौं राष्ट्रिय खेलकुदसँगै विभिन्न अन्तर्राष्ट्रिय प्रतियोगिताका स्वर्ण पदक विजेता खेलाडी हुन् ।

यसैगरी उपाध्यक्षमा लक्ष्मी भट्ट, सचिव तथा पब्लिक अफिसरमा रोजन कार्की, सदस्यता संयोजकमा मलिका थापा क्षेत्री, कोषाध्यक्षमा सोनाम लामा, कार्यक्रम निर्देशकमा मनिष थापा क्षेत्री, पब्लिक रिलेसन (पिआर) अफिसरमा राजकुमार रसाइली, प्रतियोगिता संयोजकमा नविन रसाइली र सदस्यमा प्रिन्स महर्जन छन् ।

नविन १३औं सागका स्वर्ण तथा उनका दाई राजकुमार र सोनाम कांस्य पदक विजेता हुन् । कार्यसमतिका अन्यले पनि विभिन्न राष्ट्रिय तथा अन्तर्राष्ट्रिय पदक जितेका छन् ।

अध्यक्ष महजर्नले सिड्नीमा रहेका नेपाली बालबालिकालाई खेलमा आकर्षित गर्न र नयाँ खेलाडी उत्पादनको उद्देश्यले एकेडेमी सञ्चलनमा ल्याएको बताए ।

उनले यस एकेडेमीले नेपाली खेलाडीलाई एक ठाउँमा ल्याएको बताउँदै नेपाली खेलाडी र खेलकुदको विकासका लागि संस्थागत रूपमा सहयोग गर्न सहज हुने थपे ।