काठमाडौं (हाम्रो खेलकुद) – शीर्ष वरीयताकी विपना ब्लोन र शीर्ष वरीयता प्राप्त अरहान्त केशर सिंहले १३औं एनएसआरए राष्ट्रिय स्क्वास च्याम्पियनसिपको उपाधि जितेका छन् ।

विपना र अरहान्तले गत साता सम्पन्न भएकाे प्रथम बागमती प्रेसिडेण्ट स्क्वास कप २०८२ को पनि उपाधि जितेका थिए ।

नेपाल स्क्वास एन्ड र्‍याकेट्स संघको आयोजनामा सातदोबाटोस्थित आफ्नै भवनमा रहेको स्क्वास कोर्टमा शनिबार भएको महिला एकलको फाइनलमा विपनाले दोस्रो वरीयताकी स्वस्थानी श्रेष्ठलाई ३–० को सिधा सेटमा हराइन् ।

विपनाले स्वस्थानीमाथि १२–१०, ११–७ र ११–७ को सेटमा जित निकालिन् । अस्मिता नगरकोटी तेस्रो र समिक्षा खाँण ठकुरी चौथो भइन् ।

पुरुष एकलतर्फको फाइनलमा अरहान्तले दोस्रो वरीयताका दीपक थापालाई ११–६, ११–७ र ११–५ को सोझो सेटमा पराजित गर्दै उपाधि जित्न सफल भए । पासाङ ब्लोन तेस्रो र नैना मगर चौथो भए ।

पुरुषतर्फ टिम इभेन्ट्समा बागमतीले प्रदेश १ लाई पराजित गर्दै उपाधि जित्न सफल भयो । पुरुषतर्फ ६ प्रदेशको सहभागिता रहेको थियो ।

महिला टिम इभेन्ट्समा पनि बागमती नै पहिलो भयोे । महिलातर्फ राउण्ड रोविन हुँदा बागमतीले सबै खेलमा जित निकाल्दै च्याम्पियन बन्न सफल भएको हो ।

उपाधिसँगै पुरुष एकलको विजेता अरहान्तले ९ हजार रुपैयाँसँगै ट्रफी र प्रमाणपत्र प्राप्त गरेको छ । दोस्रो भएको दीपकले ७ हजार रुपैयाँ, तेस्रो भएको पासाङ र चौथो भएको नैनाले समान ५ हजार रुपैयासँगै ट्रफी र प्रमाणपत्र प्राप्त गरे ।

महिला एकलको विजेता विपनाले ७ हजार रुपैयाँसँगै ट्रफी र प्रमाणपत्र प्राप्त गरिन् । दोस्रो भएकी स्वस्थानीले ५ हजार, तेस्रो भएकी अस्मिता र चौथो भएकी समिक्षाले समान ३ हजार रुपैयासँगै ट्रफी र प्रमाणपत्र प्राप्त गरिन् ।

२७ जेठबाट शुरु भएको प्रतियोगितामा विभिन्न प्रदेशका खेलाडीहरुको सहभागिता रहेको थियो ।