काठमाडौं (हाम्रो खेलकुद) – योङ स्टार स्पोर्टस क्लबको आयोजनामा दोस्रो संस्करणको वीर गणेशमान महिला तथा पूरुष खुल्ला बक्सिङ प्रतियोगिता असार अन्तिमबाट हुने भएको छ ।
आयोजक योङ स्टार स्पोर्टस् क्लबले राजधानीमा शुक्रबार पत्रकार सम्मेलनको आयोजना गर्दै दोस्रो संस्करणको वीर गणेशमान महिला तथा पूरुष खुल्ला बक्सिङ प्रतियोगिता असार ३१ गतेबाट साउन ४ गतेसम्म पाँच हुने जानकारी गराएको हो । प्रतियोगितामा पुरुषतर्फ १० र महिला तर्फ ८ तौलसमूहमा प्रतिस्पर्धा हुने क्लबका अध्यक्ष मथुरा दास नेवाले जानकारी गराए ।
पुरुषतर्फ तौल समूहमा ४९ केजी, ५२ केजी ५६ केजी, ६० केजी, ६४ केजी, ६९ केजी, ७५ केजी, ८१ केजी, ९१ केजी र ९१ भन्दा माथिको तौल समूह रहेको छ । यस्तै महिलातर्फ ४८ केजी, ५१ केजी, ५४ केजी, ५७ केजी, ६० केजी, ६३ केजी, ६९ केजी र ७५ केजीसम्म प्रतिस्पर्धा हुनेछ ।
प्रतियोगितामा तीन विभागीय टिम र बक्सिङ संघसँग आबद्ध २६ जिल्लाका विभिन्न क्लबले सहभागिता जनाउनेछ । प्रतियोगितामा पुरुष र महिला खेलाडी गरि करिव ४ सय खेलाडीले प्रतिस्पर्धा गर्ने अध्यक्ष मथुरा दास नेवाले जानकारी गराए । प्रतियोगिता सञ्चालन गर्न ११ लाख ५० हजार खर्च लाग्ने क्लबले अनुमान गरेको छ । प्रतियोगितालाई राष्ट्रिय खेलुकद परिषदले पाँच लाख सहयोग गरेको छ ।
प्रतियोगितामा विजयी बन्ने महिला र पुरुषका दुवै टिमले समान ५०–५० हजार प्राप्त गर्नेछ । प्रतियोगितामा उत्कृष्ट प्रदर्शन गर्न खेलाडीलाई प्रोत्साहन स्वरुप आकर्ष पुरस्कार राखिएको क्लबले जनाएको छ । प्रतियोगिताका सबै खेलहरु लैनचौरस्थित टेबलटेनिस हलमा हुनेछ ।
